नयाँ दिल्ली । भारतका प्रख्यात शायर (कवि) तथा गीतकार राहत इन्दौरीको निधन भएको छ । उनी कोरोना संक्रमणका कारण इन्दौरको एउटा अस्पतामा भर्ना भएका थिए ।

भोपालका स्थानीय पत्रकार सुरैह नियाजीलाई उल्लेख गर्दै बीबीसी हिन्दीले लेखेको छ, "७० वर्षीय राहत इन्दौरीलाई कोरोना संक्रमण तथा श्वासप्रश्वासमा समस्या भएपछि अस्पतालमा भर्ना गरिएको थियो । उनको मृत्यु हृदयाघातका कारण भएको हो ।"

इन्दौरका आरबिन्दो अस्पतालका डाक्टर विनोदी भण्डारीले समाचार एएनआईलाई बताए अनुसार मंगलबार उनलाई दुई पटक हृदयाघात भएको थियो । "तर उनलाई बचाउन सकिएन," डाक्टर भण्डारीले भने, "उनलाई ६० प्रतिशत निमोनिया थियो ।"

राहत इन्दौरीले मंगलबार बिहान ट्विटरमा आफू कोरोना संक्रमित भएको जानकारी दिएका थिए । मंगलबार नै सोही एकाउण्टमा उनको मृत्युको सूचना पनि दिइयो । शुरैह नियाजीका अनुसार सम्भवतः राहत इन्दौरीका छोराले यो ट्वीट गरेका हुन् ।

उक्त ट्वीटमा लेखिएको थियो– "राहत साहबको कार्डियाक एरेस्टका कारण साँझ ५ बजे निधन भएको छ...।"

राहत इन्दौरीले यसअघि मंगलबार बिहान आफ्नो ट्विटर एकाउन्टमा लेखेका थिए, "कोभिडको प्रारम्भिक लक्षण देखिएपछि मेरो कोरोना टेस्ट गरियो, जसको रिपोर्ट पोजिटिभ आएको छ । आरबिन्दो अस्पतालमा भर्ना भएको छु । आशीर्वाद दिनुस्, छिटोभन्दा छिटो यो रोगलाई हराउन सकुँ ।"

राहत इन्दौरीको जन्म १ जनवरी १९५० मा भएको थियो । इन्दौरकै नूतन स्कूलबाट उनले हायर सेकेन्डरीको पढाइ पूरा गरे । इन्दौरको नै इस्लामिया करीमिया कलेजबाट ग्य्राजुएसन गरे पछि उनले बरकतुल्लाह विश्वविद्यालयबाट एमए गरेका थिए ।

बितेको ४०-५० वर्षदेखि उनी विभिन्‍न मुशायरा तथा कवि सम्मेलनहरूमा आफ्नो शायरी पढ्दै आएका थिए ।

उनी एक गम्भीर शायर थिए । इन्दौरीले बलिउडका विभिन्न फिल्महरूका लागि पनि केही गीत लेखेका थिए । उनले चलचित्र घातक, इश्क, मुन्नाभाइ एमबीबीएसमा गीत लेखेका थिए ।  - बीबीसी