जनकपुर । प्रदेश २ मा पछिल्लो २४ घण्टामा ५४ जना नयाँ संक्रमित थपिएका छन् । यो समेत यस प्रदेशमा कोरोना संक्रमितको कुल संख्या एक हजार ३७७ पुगेको छ । 

मंगलबार प्रदेश २ को सामाजिक विकास मन्त्रालयले जारी गरेको विज्ञप्ति अनुसार सप्तरीमा १३ जना, धनुषामा २१ जना, महोत्तरीमा १९ जना र सर्लाहीमा एक जनामा कोरोना संक्रमण भएको पुष्टि गरिएको छ । 

संक्रमितमध्ये सप्तरीमा ३ महिला र १० पुरुष, धनुषामा २० पुरुष १ महिला, महोत्तरीमा १८ पुरुष १ महिला र सर्लाहीमा एक पुरुष छन् । 

अहिलेसम्म धनुषामा कुल संक्रमितको संख्या १२२ भएकोमा मंगलबार ३० जना कोरोनालाई जितेर घर फर्केका छन् । मन्त्रालयको अनुसार धनुषाको मुखियापटी मुसरनियाँ गाउँपालिकाका ११ जना, हंसपुर नगरपालिकाका ४ जना, सबैला नगरपालिकाका २ जना, जनकपुरधाम उपमहानगरपालिकाका ६ जना र गणेशमान चारनाथ नगरपालिकाका एक जनासहितका छन् । मंगलबार प्रदेश २ बाट ३७ जना डिस्चार्ज भएका छन् । यो समेत कोरोनालाई जितेर अस्पतालबाट घर फर्किनेको संख्या २६३ जना पुगेको छ ।