नयाँ दिल्ली । सीमा समस्या समाधानका लागि भारत-चीनबीच उच्चस्तरीय सैन्य वार्ता भएको छ ।  भारतको आग्रहमा भएको वार्ता शनिबार बिहान ८:३० बजे हुने भनिए पनि ११:३० बजे सारिएको थियो । 

सीमा क्षेत्रमा चीनले सैन्य उपस्थिति बढाउँदै भारतीय भूमिमा गतिविधि बढाएकाले गम्भीर हिसाबले वार्ता गर्ने भारतले बताएको थियो । चिनियाँ क्षेत्रमा पर्ने पूर्वी लद्दाखको लाइन अफ एक्चुअल कन्ट्रोल (एलओसी) को माल्दोस्थित बोर्ड पर्सोनेल मिटिङ पोइन्टमा वार्ता भएको भारतीय सञ्‍चारमाध्यम एनडीटीभीले जनाएको छ । 

वार्तालाई उल्लेख नगरी भारतीय सेनाले जारी गरेको विज्ञप्तिमा भारतीय र चिनियाँ अधिकारीहरू भारत-चीन सीमा क्षेत्रहरूको वर्तमान अवस्थालाई सम्बोधन गर्न स्थापित सैन्य र कूटनीतिक माध्यमहरूमार्फत वार्तालाई निरन्तरता दिने सहमति भएको जनाइएको छ । 

वार्तामा भारतले भारतीय सेनाको गस्ती टोलीले चिनियाँ पक्षले बाधा पुर्‍याएको कुरा राखेको थियो ।  भारतीय वार्ता टोलीको नेतृत्व लेफ्टिनेन्ट जनरल हरिन्दर सिंहले गरेका थिए भने चिनियाँ पक्षको नेतृत्व तिब्बत मिलिटरी डिस्ट्रिक्ट कमाण्डर लिउ लिनले गरेका थिए । 

पछिल्लो एक महिनादेखि लद्दाख क्षेत्रमा दुबै मुलुकका सेनाबीच तनाव सिर्जना भएपछि विवाद उत्‍पन्‍न भएको थियो । लद्दाखको पैंगोङ झील र पूर्वी लद्दाखको गलवान घाँटीको संवेदनशील क्षेत्रको विषयमा विवाद सिर्जना भएको थियो ।  यसअघि दुबै पक्षका स्थानीय कमाण्डरबीच १२ पटक र मेजर जनरल तहमा तीन पटक वार्ता भइसकेको छ । उक्त वार्ताले कुनै निर्णायक परिणाम हासिल गर्न नसकेपछि उच्चस्तरीय सैन्य वार्ता भएको हो ।

आज हुने वार्ताले सीमामा भइरहेको तनाव अन्त्य गर्ने विश्वास लिइएको थियो । तर, वार्ताबाट के सहमति भयो भन्‍ने खुलाइएको छैन । यसको आधिकारिक जानकारी भारतीय सेना र सरकारले सार्वजनिक गर्ने बताइएको छ । वार्ताभन्दा एकदिन अघि शुक्रबार दुबै मुलुकका राजदूतले कुटनीतिज्ञहरुसहित दुबै मुलुकका मतभिन्‍नताहरु शान्तिपूण तरिकाले वार्तामार्फत सम्‍पन्‍न गर्न आग्रह गर्दै भिडियो कन्फरेन्स गरेका थिए ।