काठमाडौं । वैशाख ३१ गते सम्पन्न स्थानीय तहको पहिलो चरणको निर्वाचनमा सबैभन्दा चासोको केन्द्र बन्यो– चितवनको भरतपुर महानरपालिका । विपरित ध्रुवका कांग्रेस सभापति शेरबहादुर देउवा र प्रधानमन्त्री समेत रहेका नेकपा माओवादी केन्द्रका अध्यक्ष पुष्पकमल दाहाल एउटै विमानमा सँगैको सिटमा बसेर भरतपुर पुगे र एउटै मञ्चबाट माओवादी केन्द्रका लागि भोट मागे । देउवा र दाहालले अन्तिम समयमा गरेको गठजोडलाई सफल बनाउन उनीहरुले भोट मात्रै मागेनन् चुनावी मञ्चबाटै एकअर्काको प्रशंसा समेत गरे ।
यस्तै कारण पनि भरतपुर महानगर चुनावी नतिजालाई लिएर देशकै आकर्षणको केन्द्र बन्यो । नागरिकले भरतपुरको मतपरिणामको ब्यग्र प्रतिक्षा गरिरहेका छन् तर अन्य महानगरपालिकाको जितको ‘सिनारियो’ देखिए पनि भरतपुर भने अझै अन्योलमा नै छ ।
२९ वटा वडा रहेको भरतपुरमहानरमा १ लाख १२ हजार ७४१ मत खसेको छ । यसमध्ये करिब ६० प्रतिशत मतगणना भइसकेको छ । १ देखि १२ नम्बर वडा र २९ र २८ नम्बर वडाको मतगणना भइसकेको छ ।
अहिलेसम्मको नतिजा अनुसार एमालेका तर्फबाट मेयरका उमेदवार देवी ज्ञवालीले ३६ सय मतले अग्रता लिइरहेका छन् । अहिले २७ नम्बर वडाको मतगणना भइरहेको छ । मघौली क्षेत्रको यो वडा कांग्रेस एमालेको लगभग बराबरी मतदाता भएको क्षेत्र मानिन्छ ।
गन्न बाँकी रहेका पश्चिम चितवनका १४, १६ र १७ नम्बर वडा एमालेको राम्रो पक्कड क्षेत्र रहेको इलाका मानिन्छ ।
यस्तै १५, १७, १८ र १९ भने कांग्रेसका मतदाता धेरै रहेको वडाका रुपमा चिनिन्छ ।
तोरीखेत क्षेत्रको १३ र १४ नम्बर वडालाई माओवादी केन्द्रले आफ्नो भन्दै दाबी गर्दै आएको छ । तर, उसले दाबी गरे जस्तो यी वडामा ठूलो संख्यामा माओवादी केन्द्रका मतदाता कम रहेको आकलन गरिएको छ ।
२३,२४,२५ र २६ नम्बर वडा माओवादीको आधार इलाका मानिन्छ । यी वडा फुलबारी, पटियानी, शिबनगरलगायतका क्षेत्रमा पर्छन् । शिबनगर प्रचण्डको आफ्नै क्षेत्र पनि भएकाले यसमा माओवादी केन्द्रले ठूलो अपेक्षा गरेको छ । रेणुको जित÷हार पनि यही क्षेत्रले निर्धारण गर्ने अनुमान गरिएको छ ।
यता, मंगलपुर, दिब्यनगर, शारदापुरलगायका क्षेत्रलाई भने कांग्रेसको पक्कड क्षेत्रका रुपमा लिइन्छ ।
सोमबार अपरान्हसम्म मतगणना हुँदा एमालेको आधार इलाका मानिने क्षेत्र सकिएका छन् । कांगे्रस र माओवादी केन्द्रका भने केही बाँकी नै छन् । त्यसैले एमालेले आफ्नो अग्रतालाई कायम राख्दै जित्नका लागि कांगे्रस र माओवादीका मतदाताले मत दिएको हुनुपर्छ । कांग्रेस मतदाताले पार्टी नेतृत्वको निर्देशन विपरित गोप्य मतदानको प्रयोग गर्दै क्रस भोटिङ प्रशस्तै गरेको मतगणनामा देख्न सकिन्छ । मेयरमा सूर्यमा मतदान गरेर बाँकी कांग्रेस उमेदवारलाई मतदान गरेको भेटिएको छ ।
अहिलेसम्मको मतगणनाको नतिजाअनुसार अब आफूले १५ सय देखी २ हजारको मतान्तरले जित्ने आधार तय भइसकेको एमालेका तर्फबाट मेयरका उमेदवार ज्ञवालीको दाबी छ ।
एमाले जिल्ला अध्यक्ष कृष्णभक्त पोखरेलले पनि आफ्नो पार्टीको जित सुनिश्चत भइसकेको दाबी गरेका छन् ।
२८ नम्बर वडाको मत गणना गरिसक्दा ५ हजार मतले लिड गर्छु भनेको एमालेले ३ हजार मतले मात्रै अग्रता लियो । यसले गर्दा जित एमालेले भने जस्तो सहज देखिँदैन तर २९ नम्बर वडाको भोट गणना भइरहँदा कांग्रेस मतदाताले क्रस भोट गरेको देखिएको छ । यो वडामा कांग्रेसको ३० प्रतिशत भोट मात्रै रेणुलाई खस्यो । बाँकी ७० प्रतिशत भोट एमाले, राप्रपा र बदर मतमा गएको देखिन्छ । २९ नम्बरको भोट ७० प्रतिशत अरुलाई नै भएपछि माओवादी केन्द्र र कांग्रेस हतोत्साही देखिएकाछन् । यो वडामा ४ हजार मतदाता छन् ।
मिश्रित मतदाता रहेको मानिने २७ र २८ को मतगणनामा पनि एमालेले सामान्य अग्रता गर्ला भन्ने अनुमानविपरित फराकिलो अग्रता काय गर्यो ।
७ हजार मतदाता भएको ११ मा भने सोचेअनुसार एमालेले राम्रो मत ल्याउन सकेन । त्यहाँ कांग्रेसको मत २९ प्रतिशत एमाओवादी केन्द्रलाई गयो । यो एमालेका लागि चुनौती बन्यो । तर, २८ र २९ मा माओवादी केन्द्रलाई सोचे अनुसारको भोट गएन जुन रेणुका लागि तनावको विषय बन्यो ।
अब रेणुका लागि आशाको केन्द्र भनेको चितवन क्षेत्र नम्बर ४ हो । संविधानसभा निर्वाचनमा नेपाली कांग्रेसका तत्कालीन सभापती सुशील कोइरालाले जितेको यो क्षेत्रबाट रेणुलाई भोट जान्छ कि जाँदैन त्यसैले उनको भाग्य र भविश्य निर्धारण गर्नेछ । यो क्षेत्रको एउटा मात्रै वडाको मत गणना भएको छ । बाँकी वडाको मत रेणुको पक्षमा कम्तिमा ५५ देखि ६० प्रतिशतसम्म खस्नुपर्नेछ । यदि यो औषतमा ६० प्रतिशतसम्म मत खसेन भने परिणाम एमालेका ज्ञवालीका पक्षमा जाने निश्चित छ । ५० प्रतिशत मात्रै पनि मत खस्यो भने कांग्रेस एमालेको भरतपुर गठजोड काम लाग्ने छैन ।
२७ नम्बर वडाको मतगणना सकिएपछि १३ नम्बर वडाको मतगणना सुरु हुनेछ । आज साँझबाट सुरु हुने यो वडाको मतगणनामा रेणुले ज्ञवालीलाई लिड गरिन् भने परिणाम माओवादी केन्द्रको पक्षमा जानसक्ने सम्भावनाको ढोका खुलेको रुपमा बुझ्न सकिनेछ । अन्यथा परिणाम उनको पक्षमा जाने संकेत देखिने छैन । यो वडामा आफूले जित्ने माओवादी केन्द्रले दाबी गर्दै आएको छ ।
१४ नम्बरको नतिजा आइसक्दा परिणाम कसको पक्षमा आउँछ र त्यसले भरतपुर महानरगरको मेयर पद कसको पोल्टामा जान्छ लगभग टुङ्गो लाग्नेछ । १४ नम्बरको परिणाम भोलीसम्ममा आउनेछ ।
२७ र २८ मा कांगे्रसको क्रस भोटले एमाले उत्साहित देखिएको छ भने कांग्रेस र माओवादी केन्द्रका मतदाता रहेको क्षेत्रको मतगणना बाँकी रहेकाले एमाओवादी पनि आशाबादी नै छ ।
ताजा मतपरिणाम अनुसार अहिले एमाले उमेदवार देवी ज्ञवालीको पक्षमा २५ हजार ४९३ मत खसेको छ भने माओवादी केन्द्रका तर्फबाट मेयरकी उमेदवार रेणु दाहालले २१ हजार ४४७ मत प्राप्त गरेकी छन् ।
