काठमाडौं । कोरोना भाइरससँग लड्न विश्व बैंकले नेपाल सरकार आर्थिक सहयोग गर्ने भएको छ ।

विश्व बैंकले नेपाललाई २ करोड २९ लाख करोड डलर अर्थात करिब ३ अर्ब ४८ करोड सहयोग गर्ने भएको छ । उक्त सहयोगसम्बन्धी सम्झौतापत्रमा आज नेपाल सरकार र विश्व बैंकबीच सम्झौता भएको छ । सहयोगसम्बन्धी सम्झौतापत्रमा अर्थ–सचिव शिशिरकुमार ढुंगाना र नेपालका लागि विश्व बैंकका कन्ट्री म्यानेजर फारिस हाजाडले हस्ताक्षर गरेका छन् । 

कोभिड १९ को महामारीका कारण तत्काल स्वास्थ्य समस्या भएका मुलुकहरूलाई सहयोग गर्ने उद्देश्यले विश्व बैंकले मार्च १७ मा पारित गरेको फास्ट–ट्रयाक फेसिलिटी (एफटीएफ) उपलब्ध गराउने घोषणा गरेको थियो । सोही घोषणाअनुसार नेपाललाई करिब ३ अर्ब ४८ करोड बराबर रुपैयाँ आर्थिक सहयोग गर्ने सम्झौता गरेको हो ।   

कोरोनासँग लड्न विश्व बैंकले नेपालसहित आफ्ना सदस्य मुलुकलाई आर्थिक सहयोग दिने घोषणा यसअघि नै गरे पनि नेपाल सरकारसँग सम्झौता नहुँदा दक्षिण एसियाका नेपाल र भुटानबाहेक अरु देशलाई आर्थिक सहायता उपलब्ध गराइसकेको छ ।

विश्व बैंकले गरेको घोषणाअनुसार पहिलो चरणमा अप्रिल २ मा २५ मुलुकलाई १९ अर्ब अमेरिकी डलर बराबरको आर्थिक सहायता उपलब्ध गराएको छ । त्यसैगरी विश्व बैंकले विश्वभर १७ अर्ब अमेरिकी डलर बराबरको महामारीलगायत विपतका विषयमा सहायता उपलब्ध गराउने विषयमा काम भइरहेको जनाएको छ ।