काठमाडौं । प्रतिनिधिसभाको शून्य समयमा छाउगोठ भत्काइएकोमा सांसदले आपत्ति जनाएका छन् ।

सांसद् गजेन्द्रबहादुर महतले काम नपाएको बुहारीले ... पुछर कन्याएर बसेझैं गृहमन्त्रालयले प्रशासन लगाएर छाउगोठ भत्काएको भन्दै आपत्ति प्रकट गरेका हुन् ।

“हाम्रो गाउँघरतिर उखान छ, काम नपाए बुहारी... पुछर कन्याऊ, गृहमन्त्रालय यस्तै छ । छाउगोठको नाममा हाम्रा घर भत्काइएको छ । एउटा व्यक्ति मृत्यु भयो भन्दैमा हाम्रो घर भत्काउन पाइन्छ ? आठजना मान्छे होटलमा मृत्यु भएको छ ।

होटल भत्काउँदै हिँड्ने ? हजारौं मान्छे गाडीमा मृत्यु भएको छ । बस भत्काउँदै हिँड्ने, आगो लगाउँदै हिँड्ने ? त्यो पनि तरिका हुन्छ ? चाहिँदो काम गर्नुपर्‍यो । जिल्लामा जाने नुन बेचिया छ । औषधि बेचिया छ । भ्रष्टाचार भएको छ उनीहरूलाई समात्नु छैन । पुलको बेहाल छ ।

बाटोको अवस्था के छ स्कुलको अवस्था के छ ? ठेकेदार कहाँ भागेको छ  ? त्यो हेर्नुपर्दैन ? हिजो गोर्खाली सेनाको नामम हाम्रो घर भत्काइयो । आज छाउगोठको नाममा भत्काइँदैछ । के हेरेर बसेको छ गृहमन्त्रालय ? काम पाएको छैन ?” उनले प्रतिनिधिसभाको शून्य समयमा भने ।