काठमाडौं । प्रधानमन्त्री पुष्पकमल दाहाल प्रचण्डले संविधान संशोधन प्रस्ताव तयार भइसकेको बताएका छन् ।

सरकारका सय दिनका कामको बारेमा जानकारी गराउन शुक्रबार आयोजित पत्रकार सम्मेलनमा उनले यस्तो बताएका हुन् । पत्रकारले राखेको जिज्ञासाको जवाफमा उनले भने–“संविधान संशोधन प्रस्ताव तयार भएको छ । प्रस्तावमा प्रतिपक्षको पनि सहमति जुटाउने कोशिस भएको छ ।प्रतिपक्षको पनि सहमति जुट्यो भने संशोधन प्रस्ताव पारित हुन सहज हुनेछ र निर्वाचनमा जान सहज हुन्छ ।”

उनले २५ गते नै संविधान संशोधन प्रस्ताव दर्ता गराउने तयारी भए पनि प्रतिपक्षसँग सहमति जुटाउने प्रयासमा रहेकाले ढिलाई भएको बताए ।

“संशोधन प्रस्ताव २५ गते नै प्रस्ताव दर्ता गरौं भन्ने तयारी थियो,” उनले भने, “प्रमुख प्रतिपक्षी दलको नेता केपी शर्मा ओलीले संशोधन प्रस्ताव दर्ता गर्नुस् मेरो सहमति छ भन्नुभएको थियो तर पछि एमालेका केही नेताको अभिव्यक्ति आएपछि कांग्रेस सभापति शेरबहादुर देउवाले फेरि छलफल गर्नुस् भन्नुभयो । त्यही अनुसार हिजो छलफल भएको हो, आज प्रतिपक्षी दलको नेतासँग कांग्रेस सभापति शेरबहादुर देउवाजीले पनि छलफल गर्नुभएको छ । अब हामी फेरि छलफल गरेर यही महिनाभित्रै संशोधन प्रस्ताव दर्ता गराउँछौं ।”

उनले केही जिल्लाको सिमांकन हेरफेर हुने, नागरिकता अन्तरिम संविधानबमोजिम नै हुने, राष्ट्रियसभामा प्रतिनिधित्व जनसंख्याका आधारमा बढी हुने र बाँकी सबै प्रदेशबाट बराबर बनाउने बारेमा पनि छलफल भएको जानकारी दिए ।

प्रधानमन्त्री दाहालले सामाजिक सञ्जालमा आउने टिकाटिप्पणी बढी दुरुपयोग भएको बताए । उनले भने,“सामाजिक सञ्जालमा आएका सकारात्मक टिप्पणीलाई त्यहीअनुसार नै लिएर अघि बढ्छौं । तर फेसबुकसहित सामाजिक सञ्जालमा धेरै नकारात्मक विषय आएर दुरुपयोगको खतरा बढेको छ । सोसल मिडियामा गलत टिप्पणी भाइरल हुने हुँदा यसमा पत्रकार पनि सचेत हुनुपर्ने देखिएको छ ।”

“सोसल मिडियामा गलत् टिप्पणी गरेर भाइरल हुने खतरा छ,” प्रधानमन्त्री दाहालले भने,“रियल जर्नालिष्टको लागि बढी चासोको कुरा हो । तपाइँहरुले बढी ध्यान दिनुहोला ।”