गत वर्ष आउनुभएको महाभूकम्पजी विनाशकारीमात्र होइन, उपद्रयाहा पनि हुनुहुँदोरहेछ । भूकम्प आयो भनी सबै कर्मचारी बाहिर निस्केको बेलामा टपक्क लाएर फाइल टिपेर हिँड्नुभएछ । फाइलै चाहिएको थियो भने यत्रो विनाश मच्चाइराख्नै पर्दैनथ्यो नि । खुसुक्क लाएर सरकारलाई त्यो लोकमान फाइल दिनोस् भनेको भए त भैहाल्थ्यो नि । फेरि सरकारलाई नि लास्टै घाँडो भैरा’को फाइल थ्यो त्यो । कहिले कसले माग्ने, कहिले कसले देखा भनेर टिप्पा लिने टन्टै हुन्नथ्यो । फाइल राख्दा आइपर्ने दसौं रेक्टर स्केलका कम्पनहरुले आजित थियो सरकार पनि । माग्दा पाइने कुरा चोरेर हिँड्नुभएछ । लाग्छ, मूर्खै हुनुहुँदो रहेछ भूकम्पजी पनि अरु बलवानहरुजस्तै ।

हुन त फाइल पनि कम्ताको फाइल होइन । खुद लोकमानजीकै फाइल पर्यो । लोकतन्त्र जो चलिरा’छ । त्यही तन्त्रवाला लोकको पनि मान । पूर्वराजतन्त्रको जीवित सान । ‘माने मान् नत्र हान्’ भन्ने मान्यताका साथ विराजमान लोकमानको फाइल लुसुक्क आएर लान नमिल्ने भएर पनि होला, भूकम्पजी यस्तो तान्डवका साथ आउनुपरेको । एउटा दुलहाले दुलही लगी भित्र्याउन त कत्रा गाना–बजाना, जन्ती, रत्यौली चलाउन पर्छ । दशैमा शक्ति पीठहरुमा फूलपाती भित्र्याउन त कत्रा तामझाम, लावालस्कर जुटाउनुपर्छ । स्वयं लोकमानजीकै जागिरको फाइल सिंहदरबारबाट भूकम्पलोक पुर्याउनु थियो त लुसुक्क आएर किन हुन्थ्यो ? भूकम्पजी ठूलो बाहुबलका साथ भस्ल्यांग भस्ल्यांग घरहरु भत्काउँदै आएर फाइल लिएर हिँड्नुभएछ । आखिर त्यत्रो भूकम्प आएको त्यही फाइलको लागि पो रहेछ । जाबो एउटो फाइलको लागि यत्रो धनजनको क्षति भयो । यतिका मान्छेको परान गयो । नियुक्ति फाइल बनाउनासाथ भूकम्पजीकहाँ पुर्याइदिएको भए हुन्नथ्यो ? हुनत कसरी पुर्याउनु ? भूकम्प यहाँ आउँदा त यत्रो बितण्डा मच्चायो, भूकम्पकहाँ नै जाँदा त के गर्ला झन् ? भूकम्पजीको अगाडि मान्छे पर्न सक्नु भनेको लोकमानजीको अगाडि दल र नेताहरु पर्नुजत्तिकै गाह्रो कुरा हो ।

हवाई दुर्घटनामा परेर २–४ जनाको परान जाँदा त छानबिन आयोग बन्थ्यो । भूकम्पमा परेर दशौं हजार मान्छे मर्दा किन छानबिन आयोग बनेन भन्या त भूकम्पजीको सम्बन्ध सिधै लोकमानजीसँग रहेछ । केका आँटले बनाउनु ? जनतालाई भूकम्प प्रतिरोधी घर बनाउन अनुदान दिन किन ढिलाइ गरियो भन्या त कारण यो पो रहेछ । भूकम्प प्रतिरोधी घरले भूकम्पको प्रतिरोध गर्ने । अब भूकम्पको सम्बन्ध सिधै लोकमानजीसँग । आफ्ना रिलेटिभको प्रतिरोध गर्ने षड्यन्त्र गर्दा लोकामानजीले बिताउनुन्छ भनेर सरकार आत्तिएको हुनुपर्छ । नत्र सरकार पनि कम्ति आँटिलो होइन । लोकमानजीसँगै आमने–सामने हुने स्थिति आइलाग्यो त क्यार्नु ?

अब लोकमानजीको फाइल भूकम्प सरले लगिसक्नुभो भन्ने जानकारी पाइसकेसी सर्वोच्चजीले नि किन चाहियो, चाहियो, नभै भएन भनेर अड्डी लिराको होला ? यसो गर्दा लोकमानजीमा क्रोध उत्पन्न हुन सक्छ । उहाँमा क्रोध पैदा भयो भने भगवान इन्द्रको अमरावती डोलायमान हुन्छ र त्यसको प्रभाव सिधै पृथ्वीमा पर्छ । यसको कल्पनाले मात्र पनि हाम्रा दल र नेताहरुका मुटु डगमगाउन थाल्छ । यदि उहाँमा साँच्चिकै क्रोध पैदा भैहालेमा के होला ? 

बडा अफ्ठेरो छ, अब फाइल उपलब्ध गराउन कि त भूकम्प आफैं आउनुपर्यो । भूकम्प आउने कुरा सोच्दामात्रै नि हंशले ठाउँ छोड्छ । कि त भूकम्पकहाँ गएर फाइल ल्याउन पर्यो । लिन जाने पो को ? 

अब गाह्रो नेताहरुलाई ! लोकमानजीको फाइल खोजेर, मिलाएर साथ दिम् कसरी दिम्, खाँचै सित्ती भनुम् भने लोकमानजीले भूकम्प ल्याउने डर ।

प्रधानमन्त्रीलाई त देखाइसक्नुभो, साथ दिने भए देऊ, नत्र मेरो एउटै सहारा भूकम्प रहेछ । त्यही भूकम्प ल्याउँछु, त्यसैले साथ दिन्छ । भूकम्पको कुराले दिल्लीमै उनको ज्यान कामिसक्यो होला । अरु कतिको काम्ने हो !

नेताहरुको हत्ते भो । फाइल छोडिदिए हुने ! आखिर यो मुलुकमा हराएको त्यो फाइलमात्र होइन । अनेकौं छन् । पहिलो कुरा त अख्तियारकै कारबाहीमा परेका मान्छे अख्तियारकै प्रमुख बनाउँदा शर्म हराइसक्या’छ । जसरी नियुक्त भए, त्यसले लोकतन्त्रको मर्म हराइसक्या’ छ । मुलुकमा अरु कोही नदेख्ने दलहरुको मति हराइसक्या’ छ । नियुक्ति गराउँदै गर्दा तिनका धोती हराइसक्या’ छ । यससँगै लोकलाज हराइसक्या’ छ । सरकार, दल र नेताहरु हेर्नुस्, इज्यत हुर्मत हराइसकेको छ । क्रियाकलाप हेर्नुुस, बुद्धि विवेकै हराइसक्या’ छ । त्यही फाइल टप्काउने भूकम्पका पीडितको स्थिति हेर्नुस्, दयामाया, जिम्मेवारीबोध नै हराइसकेको छ । क्या हो यस्तो ए ! भनेर खोजुम् त, सरकारै हराइसक्या छ । छन् त केवल लोकमान छन्, उनको अख्तियार छ ।

सबै कुरा हराएकै थ्यो, चलिनै रा’थ्यो । एउटा फाइल नि हरायो त के नै होला, फाइल हराइरहोस् । त्यो भूकम्पलाई दाइजो भो । लोकमानजीले भूकम्प ल्याउलान् फेरि, सरकारको होस हराउने भयो ।