काठमाडौं । प्राध्यापक केदारभक्त माथेमाले काठमाडौं विश्वविद्यालय (केयु) को सिनेट सदस्य पदबाट राजीनामा दिएका छन् ।

 

चिकित्साशास्त्रतर्फको प्रवेश परीक्षामा अख्तियार दुरुपयोग अनुसन्धान आयोगले गरेको हस्तक्षेपबारे व्यवस्थापन मौन रहेको भन्दै केदारभक्त माथेमाले काठमाडौं विश्वविद्यालय (केयु) को सिनेट सदस्य पदबाट राजीनामा दिएका हुन् । 

 

माथेमाले राजीनामा पत्रमा केयुको चिकित्साशास्त्रतर्फ स्नातकोत्तर तहको प्रवेश परीक्षामा आयोगको हस्तक्षेप र परीक्षा बोर्डका एक सदस्यको नैतिक आचरणबारे लागेको आरोपबारे विश्वविद्यालय व्यवस्थापनले कुनै प्रतिक्रिया नदिएको उल्लेख छ । उनले मंगलबार जारी गरेको वक्तव्यमा लेखिएको छ–यस्तो आरोपले विश्वविद्यालयको स्वायत्तता र परीक्षा प्रणालीको अखण्डतामाथि गम्भीर प्रश्न उठेको छ ।

 

काठमाडौं विश्वविद्यालय अन्तर्गत चिकित्साशास्त्रतर्फ एमडी र एमएस तर्फको प्रवेश परीक्षामा अख्तियार दुरुपयोग अनुसन्धान आयोगले हस्तक्षेप गरी आफैं प्रश्नपत्र तयार पारी परीक्षा सञ्चालन गरेको थियो । 

 

विश्वविद्यालयमाथि गम्भीर आरोपहरु लागिरहँदा पनि व्यवस्थापन यसरी मौन रहनु आश्चर्यजनक भएकोले आफूले विश्वविद्यालयको सिनेट सदस्यबाट राजीनामा दिने कठोर निर्णय गरेको माथेमाले उल्लेख गरेका छन् ।