काठमाडौं । काठमाडौं महानगरपालिकाको नगर सभा ११औँ अधिवेशन आजबाट सकिएको छ ।

असार ५ गतेबाट सुरु भएको अधिवेशनमा महानगरका मेयर बालेन्द्र साह (बालेन)ले आर्थिक वर्ष २०७९/०८० का लागि वार्षिक नीति तथा कार्यक्रम पेस गरेका थिए । यो प्रस्ताव असार ८ गते बसेको सभाको दोस्रो बैठकले सर्वसम्मत पारित गरेको थियो । 

असार १० गते सम्पन्न सभाको तेस्रो बैठकमा उपमेयर  सुनिता डंगोलले आर्थिक वर्ष २०७९/०८० का लागि २५ अर्ब ४१ करोड ९६ लाख ९६ हजार रुपैयाँको अनुमानित बजेट पेस गरेकी थिइन् । त्यसै बैठकमा सभाका अध्यक्ष एवं महानगरका मेयर साहले आर्थिक विधेयक र उपमेयर डंगोलले विनियोजन विधेयक पेस गरेका थिए । 

यसरी पेस गरिएको बजेट तथा कार्यक्रममाथि असार १७, २२ र आज बसेको बैठकमा छलफल भएको थियो । छलफलका क्रममा उठेका सुझावलाई समेटेर आजको बैठकले आर्थिक वर्ष २०७९/०८० को बजेट तथा कार्यक्रम र विनियोजन विधेयक सर्वसम्मत पारित गरेको छ ।

सभा पेस भएको आर्थिक विधेयक असार १७ गते बसेको चौँथो बैठकबाट पारित भएको थियो । 

यसरी पारित भएको नीति, बजेट तथा कार्यक्रमले आगामी वर्षमा महानगरका गतिविधिहरू थप संस्थागत हुँदै जाने बैठकका अध्यक्ष एवं महानगरका मेयर साहले विश्वाश रहेको बताए । "सभामा पेस भएका सबै प्रस्तावहरूमाथि सौहाद्र छलफल भयो । सर्वसम्मत पारित भयो । बजेट, नीति तथा कार्यक्रमसहित विभिन्न नीतिगत र कानुनी व्यवस्था सम्बन्धी निर्णय भयो," मेयर साहले भने । 

न्यायिक समितिका सदस्यहरुको पद तथा गोपनीयताको शपथ पनि आजै सम्पन्न भएको छ । आज नै सम्पन्न भएको निर्वाचनबाट वडा २९ का अध्यक्ष कुश ढकाल र वडा ११ की महिला सदस्य आशा श्रेष्ठ रौनियार निर्विरोध निर्वाचित भएका छन् । उनीहरूलाई मेयर साहले पद तथा गोपनीयताको शपथ गराएका थिए । 

त्यसैगरी निर्वाचन अधिकृत दिपक अधिकारीले न्यायिक समितिको सदस्यमा निर्वाचित भएको प्रमाण पत्र वितरण गरेका थिए । 

नेपालको संविधानको धारा २१७ मा स्थानीय विवादको समाधान गर्न ३ सदस्यीय न्यायिक समितिको व्यवस्था गरेको छ ।

 जसमध्ये उपमेयर संयोजक हुने र बाँकी दुईजना नगर सभा सदस्यमध्येबाट निर्वाचित हुने व्यवस्था छ ।

तीनवटा समिति गठन :
आजको बैठकले नगर सभाअन्तर्गत लेखा, विधायन र विकास तथा सुशासन गरी तीनवटा समिति गठन गरेको छ । समितिका पदाधिकारी यसअनुसार छन् । 

लेखा समिति 
गायत्री पुडासैनी, वडा नं. ६ – संयोजक  
रेसल श्रेष्ठ, वडा नं. २० – सदस्य
सतिश तण्डुकार, वडा नं. १० – सदस्य
हीरादेवी पोरखेल, वडा नं. २१ – सदस्य
शर्मिला परियार, वडा नं. ३ – सदस्य

विधायन समिति 
र"पा थापा, वडा नं. ७ – संयोजक
नानीहेरा डंगोल, वडा नं. १२ – सदस्य
प्रवेश श्रेष्ठ, वडा नं. २६ – सदस्य
हुमादेवी आचार्य, वडा नं. ३१ – सदस्य    
पुष्प महर्जन, वडा नं. १६ – सदस्य

विकास तथा सुशासन समिति
सिर्जना भेटवाल, वडा नं. ९ – संयोजक
न्हुच्छेदेवी महर्जन, वडा न. २१ – सदस्य 
रेणुकमल शाही, वडा नं. १९ – सदस्य
जितेन्द्र खड्गी, वडा नं. १७ – सदस्य
अप्सरा खत्री, वडा नं. १५ – सदस्य