विराटनगर । मोरङको सुन्दरहरैँचा नगरपालिकास्थित एक सहकारी संस्थाबाट रकम हिनामिना गरेको आरोपमा एक कर्मचारी पक्राउ परेका छन् । स्थानीय कनकलक्ष्मी बचत तथा ऋण सहकारी संस्थाकाका कर्मचारी विवेक खवासलाई ४६ लाख रुपैयाँ भन्दा बढी रकम हिनामिना गरेको आरोपमा पक्राउ गरिएको इलाका प्रहरी कार्यालय बेलबारीले जनाएको छ । 

उनीमाथि ४६ लाख ८७ हजार ९२५ रुपैयाँ हिनामिना गरेको आरोप लागेको छ । प्रहरीसँगको प्रारम्भिक  बयानमा खवासले ३१ लाख रुपैयाँ हिनामिना गरेको स्वीकार गरेका छन् । तर, छानबिन समितिले ४६ लाख हिनामिना भएको आरोप लगाएको छ । 

खवासले सहकारी संस्थाको गोठगाउँ सेवा केन्द्रमा कार्यरत थिए । रकम हिनामिना भएको खुलेपछि सहकारीको सञ्चालक समितिका सचिव यमप्रसाद सिग्देलको संयोजकत्वमा छानबिन समिति गठन गरिएको थियो । 

खवासले ३१ लाख रुपैयाँ आउँदो भदौ १० गतेसम्ममा तिर्ने सहमति गरेका थिए । तर, हिनामिना रकमको परिमाण बढ्दै गएपछि सहकारीको तर्फबाट किटानी जाहेरी दिइएको थियो । खवासले १० लाख रुपैयाँ फिर्ता गरिसकेको संस्थाका सचिव सिग्देलले बताए । 

खवासले बचतकर्ताको रकम आफैँ किर्ते हस्ताक्षर गरी आफैँले राखेको बताइएको छ । सफ्टवेयरको प्रयोगबाट कारोबार हुने गरेकोमा खवासले नक्कली कागजात बनाएर रकम झिक्ने गरेको छानबिन समितिको अनुसन्धानबाट खुल्न आएको छ । सहकारीमा ८,००० सेयर सदस्य छन् ।