रियाद । मानव अधिकारवादी अभियन्ताहरूले साउदी अरेबियाले सरकार विरोधी प्रदर्शनमा भाग लिएको आशंकामा १३ वर्षको उमेरमा पक्राउ गरेको एक व्यक्तिलाई रिहाइ गरेको बताएका छन् । कुनै समय मुर्ताजा कुरेइरिसलाई मृत्युदण्ड सनुाइएको थियो । पछि आएर उनको सजाय आजीवन कारावासमा परिणत गरिएको थियो ।
सन् २०११ मा अरब वसन्त ऋतु क्रान्ति सुरु भएपछि लहरको रूपमा अरब जगतमा चलेको सरकार विरोधी जन प्रदर्शनमा सहभागी भएको अभियोगमा उनलाई सन् २०१४ मा गिरफ्तार गरिएको थियो ।
संभवत राजनीतिक प्रदर्शनमा संलग्न भए बापत पक्राउमा पर्ने कुरेइरिस साउदी अरेबियाकै सबैभन्दा कम उमेरका व्यक्ति हुन् । पुरानो भिडियो फुटेजमा उनी साउदी अरेबियाको पूर्वी प्रान्तमा अन्य बालबालिकासँगै साइकल चढेर जुलुसमा सहभागी भइरहेको देखिन्छ । यस प्रान्तमा प्रायः साउदीको अल्पमत सिया मुस्लिम समुदायको बसोबास छ ।
सुन्नी मुस्लिमको बाहुल्य रहेको साउदीमा लामो समयदेखि सिया समुदायले आफुहरूमाथि नराम्ररी भेदभाव हुने गरेको र दोश्रो दर्जाको नागरिकका रूपमा व्यवहार हुने गरेको गुनासो गर्दै आएको छ ।
अरव जगतभर फैलिएको आन्दोलनका क्रममा उनीहरूले पनि सडकमा ओर्लेर साउदी सरकारविरुद्ध प्रदर्शन गरेका थिए । ती प्रदर्शन सुरक्षा फौजले बल प्रयोग गरी दबाएको थियो । त्यस सिलसिलामा पक्राउ परेका मध्ये दर्जनौँ व्यक्तिलाई पछि मृत्युदण्ड दिइएको थियो ।
मानव अधिकारवादी समूहहरूले धेरै वर्षसम्म कुरेइरिसलाई मुद्दा नचलाईकन त्यसै थुनेर राखेको बताएका थिए । अन्ततः उनलाई एउटा उग्रवादी आतंककारी समूहको सदस्य भएको आरोप लगाउँदै मुद्दा चलाइएको थियो ।
उनलाई प्रहरी चौकीमा पेट्रोल बम प्रहार गर्ने आफ्नो दाजुलाई साथ दिएको पनि आरोप लगाइएको थियो ।
बीबीसीबाट ।
