जनकपुधराम । सिन्धुली गोलान्चोर गाउँपालिका २ की राधिका कार्कीको हत्या प्रयास मुद्दामा जाहेरी दर्ता भएको छ । आइतबार जिल्ला प्रहरी कार्यालय धनुषामा राधिकाकी आमा अम्बिका कार्कीले जाहेरी दर्ता गराएकी हुन् ।

राधिकामाथि हत्या प्रयास भएकोबारे अनुसन्धान गरेर दोषीलाई कारबाहीको माग गरेर उनकी आमाले जाहेरी दिएको धनुषाका प्रहरी नायव उपरीक्ष (डीएसपी) प्रदीप क्षेत्रलीले जानकारी दिए ।

तर, जाहेरीमा आरोपितको नाम किटान गरिएको छैन । राधिकाले भने आफूमाथि क्षिरेश्वरनाथ नगरपालिका महेन्द्रनगरका अरूण साहले करेन्ट लगाएर ज्यान लिने प्रयास गरेको बताएकी थिइन् ।

प्रहरीकाअनुसार अब घटनाबारे अनुसन्धान सुरु हुने छ । प्रविधि, स्थानीय, आफन्त र साथीभाइको सहयोगमा अनुसन्धान गरेर वास्तविक दोषी पत्ता लगाइने प्रहरीले जनाएको छ । त्यसपछि पुनः किटानी जाहेरी दर्ता हुन सक्ने अथवा अनुसन्धानबाट दोषी देखिएको प्रतिवेदनको अधारमा पनि अदालतमा दोषीलाई बुझाउन सकिने छ ।

• आठ महिनासम्म सँगै बसे, विवाह गरौँ भन्दा प्रेमीले 'करेन्ट लगाएर मार्न खोजे'

राधिकाले बाह्रखरीसहितका मिडियालाई प्रेमी अरूण साहले ज्यान लिने प्रयास गरेको बताएकी थिइन् । अहिले उनको उपचार प्रादेशिक अस्पताल जनकपुरधाममा भइरहेको छ । आक्रमणबाट उनको पेट, हात र खुट्टामा असर पुगेको छ । शरीरको ३० प्रतिशत भाग जलेको उपचारमा संलग्न चिकित्सकको भनाइ छ । हात र खुट्टाको औला काम गरेको छैन् । औँलाहरू काट्नुपर्ने चिकित्सकको सल्लाह छ । जलेको भागमा प्लास्टर गरिएको छ ।

दुवैजना जनकपुर थापा चोकस्थित कोठा भाडा लिएर बस्दै आएका थिए । उनीहरू आठ महिनादेखि सँगै रहेको पीडितको भनाइ छ । पीडित किशोरीकाअनुसार विवाह गरेर लैजान आफूले आग्रह गर्दा अरूणले नमानेपछि विवाद भएको हो ।