काठमाडौं । काठमाडौं महानगरको एकीकृत एवं समन्वयात्मक विकास प्रणाली विकास गर्न निकायगत रूपमा हरेक महिनाको पहिलो सोमबार समन्वय समितिको बैठक बस्ने भएको छ । 

काठमाडौंको विकासमा साझेदार गर्न महानगरपालिका, नेपाल विद्युत् प्राधिकरण, काठमाडौं उपत्यका खानेपानी लिमिटेड, दूरसञ्चार प्राधिकरण, सडक विभाग, मेलम्ची खानेपानी आयोजना लगायतका निकायहरूको बैठक बस्ने भएको हो । 
महानगरका अनुसार आगामी सोमबार बस्ने बैठक दिनको ३ बजे बस्नेछ । बैठकमा विकास साझेदार कार्यालयका व्यवस्थापन र कार्यकारी भूमिकामा रहेका पदाधिकारी उपस्थिति रहनेछ । 

त्यस बैठकले चालु योजना कार्यान्वयनको समीक्षा गर्नेछ । यसैगरी, एकीकृत कार्यक्रमबाट सञ्चालन गर्न सकिने योजनाको यकिन गर्नेछ । यसबाट सहरी पूर्वाधार तथा सेवा वितरणमा देखिएका समस्या समाधान हुनेछ अपेक्षा गरिएको छ । 
विभिन्न निकायसँगको समन्वय गर्न शुक्रबार महानगरका मेयर बालेन्द्र साहको अध्यक्षतामा शुक्रबार बसेको बैठकले सो निर्णय गरेको थियो । 
साहका अनुसार कानुनी तथा व्यावहारिक पक्ष, प्रबन्ध, संयोजन तथा समायोजन गर्नुपर्ने पक्षलाई व्यवस्थित गर्न यस प्रकारको बैठक बस्न लागिएको छ । विकास निर्माणका कामलाई व्यवस्थित गर्न र सेवाप्रवाहलाई पारदर्शी बनाउन समन्वय बैठक प्रभावकारी हुने शाहको भनाइ छ ।