किभ । युक्रेनका पूर्वराष्ट्रपति पेट्रो पोरोशेन्कोले आफूलाई देश छोड्न रोक लगाइएको शनिबार बताएका छन् । रुसले आक्रमण गरेदेखि नै सरकारले आन्तरिक राजनीतिक युद्धविराम तोडेको आरोप उनले लगाएका छन् ।

सन् २०१४ देखि २०१९ सम्म सत्तामा रहेका पोरोशेन्को युद्ध सुरु भएदेखि अन्तर्राष्ट्रिय टेलिभिजनमा उनको दलको धारणा राख्न पटक-पटक सार्वजनिक हुने गरेका छन् । राष्ट्रपति भोलोदिमिर जेलेन्स्कीको सत्तारूढ दलपछि ठूलो उनको युरोपेली सोलिडारिटी पार्टी युक्रेनको संसद्मा दोस्रो ठूलो दल हो ।

रुसले आक्रमण गरेपछि युक्रेनको संसद्ले धेरै रुसी समर्थक दलहरूलाई प्रतिबन्ध लगाएको छ भने अरूलाई अझै पनि तथाकथित राजनीतिक युद्धविरामको सीमामा रहेर गतिविधि सञ्चालन गर्न अनुमति दिएको छ । यसले सबै युक्रेनी दलहरू युद्धविरुद्ध एकजुट हुन घरेलु राजनीतिक असहमतिहरू पन्छाएर अघि बढेका छन् ।

पोरोशेन्कोको कार्यालयले सरकारले रुसविरूद्धको ऐक्यबद्धता जनाउन भएको सम्झौता उल्लंघन गरेको आरोप लगाउँदै उनलाई ‘युक्रेनी सीमा पार गर्न दिन अस्वीकार गरिएको’ जनाएको छ ।

“यो निर्णयबाट अधिकारीहरूले युद्धकालमा लागु रहेको ‘राजनीतिक युद्धविराम’ भंग गर्ने खतरा भएको छ । रुसी आक्रमणको सामना गर्नुपर्दा राष्ट्रिय एकताको एउटा बलियो आधार घरेलु ऐक्यबद्धता थियो । तर, सरकारबाट यो भंग गरिएको छ,” उनको कार्यालयले भनेको छ ।

पोरोशेन्को युक्रेनी प्रतिनिधिमण्डलको नेतृत्व गर्दै लिथुआनियामा भएको नाटो संसदीय सभाको बैठकमा सहभागिता जनाउन जानुपर्ने थियो । सरकारबाट यसअघि यात्रा गर्ने अनुमति प्राप्त गरेका थिए । यद्यपि, पछिल्लो कदमले त्यहाँ सहभागी हुने सम्भावनालाई अन्त्य गरिदिएको छ ।

उनले लिथुआनियाका राष्ट्रपति गितानास नौसिदा र युरोपेली संसद्का एक समूहसँग भिल्नियसमा भेटवार्ता गर्न लागेका थिए । त्यसपछि उनी युरोपेली राजनीतिक दलहरूका नेतृत्वलाई एक ठाउँमा भेला गर्ने शिखर सम्मेलनका लागि नेदरल्यान्ड्सको रोटरड्याम जाने कार्यक्रम रहेको थियो । रासस/एएफपी