काठमाडौं । साताको अन्तिम कारोबार दिन शुक्रबार सेयर बजार परिसूचक नेप्सेमा दोहोरो अंकको गिरावट भएको छ । शुक्रबार नेप्से १५.८२ अंकले गिरावट भएर  २२२३.७८ अंकमा बन्द भएको छ । 

नेप्से घट्दा होटेल तथा पर्यटन उपसूचकबाहेक सबै उपसूचकमा गिरावट भएको छ । 
 
नेपाल राष्ट्र बैंकले मौद्रिक नीतिको तेस्रो त्रैमासिक समीक्षा सार्वजनिक गर्दै ब्याजदर अझै बढ्ने संकेत गर्दा सेयर लगानीकर्ता थप ‘पेनिक’ बनेका छन् । जसले गर्दा नेप्सेमा गिरावट हुँदा पनि लगानीकर्ता बजारबाट बाहिरिन खोज्दा बिहीबारको तुलनामा कारोबार रकम भने बढेको छ ।  

बिहीबार ८८ करोडमा सीमित भएको कारोबार रकम आज १ अर्ब २९ करोड ८९ लाख पुगेको छ ।    

आज बजारमा प्रभु बैंकको संस्थापक सेयर सर्वाधिक १७ करोड ६० लाख ७५ हजारको कारोबार भएको छ । त्यस्तै मर्जरको चर्चा चलिरहेको मेगा बैंकको ९ करोड ८२ लाख र अरुण भ्याली हाइड्रोपावरको ४ करोड ६२ लाखको कारोबार भएको छ ।

आज दिनभर बजारमा १९३ कम्पनीको सेयर कारोबार भएकोमा १४६ कम्पनीको  सेयरमूल्य घटेको छ भने ३८ कम्पनीको सेयरमूल्य बढेको छ । यस्तै ९ कम्पनीको  सेयरमूल्य भने स्थिर छ ।

आज कारोबार भएकामध्ये  रुरु जलविद्युत् कम्पनीको सेयरमूल्य ६.१३ प्रतिशतले वृद्धि हुँदा नारायणी विकास बैंकको ५.३१ प्रतिशत र उपकार लघुवित्तको सेयरमूल्य  ४.०४ प्रतिशतले बढेको छ । 

यता, दिव्येश्वरी हाइड्रोपावरको सेयरमूल्य सवार्धिक ३.७५ प्रतिशतले गिरावट हुँदा हिमाल दोलखा हाइड्रोपावरको ३.७४ प्रतिशत र कर्णाली डेभलपमेन्ट बैंकको  सेयरमूल्य ३.६५ प्रतिशतले गिरावट भएको छ ।