जनकपुरधाम । स्थानीय तह निर्वाचनअन्तर्गत जनकपुरधाम उपमहानगरपालिकाको मतगणना जारी छ । ६० प्रतिशतभन्दा बढी मत गणना भइसकेको छ ।

पछिल्लो गणनाअनुसार स्वतन्त्र उमेदवार मनोजकुमार साहको अग्रता कायमै छ । उनले नौ हजार ७७४ मत ल्याएका छन् । नेकपा (एमाले)का उमेदवार शिवशंकर साहले सात हजार ६०४ मतसहित उनलाई पछ्याइरहेका छन् । उनीहरूबीचको मतान्तर दुई हजार १७० छ । नेपाली कांग्रेसका नेता मनोजकुमार पार्टीले टिकट नदिएपछि घण्टाघर चुनाव चिह्नबाट स्वतन्त्र प्रतिस्पर्धामा छन् ।

यस्तै, प्रमुखमा पदमा लोकतान्त्रिक समाजवादी पार्टी (लोसपा)का उमेदवार मनोज चौधरी तेस्रो स्थानमा छन् । उनले तीन हजार ९५८ मत पाएका छन् । सत्ता गठबन्धनका तर्फबाट उमेदवार बनेका जनता समाजवादी पार्टी (जसपा)का लालकिशोर साह तीन हजार ३६१ मतसहित चौथो स्थानमा छन् ।

पाँचौँ स्थानमा रहेका स्वतन्त्र उमेदवार बलराम महतोको तीन हजार ८५ र अर्का स्वतन्त्र उमेदवार जानकी राम साहले १५ सय मत ल्याएका छन् ।

यस्तै, डा. सीके राउत नेतृत्वको जनमत पार्टीकी उमेदवार अनिता साहले एक हजार १५८ मत पाएकी छन् । तराई मधेस लोकतान्त्रिक पार्टी (तमलोपा)की विभा ठाकुरले ९१० मत ल्याएकी छन् ।