काठमाडौं । नेपाली राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरी र खेलाडीबीच भएका विवादको समस्या पहिचान र सिफारिस कार्यदलले बुधबार एन्फालाई प्रतिवेदन बुझाएको छ । कार्यदलका संयोजक अवकाशप्राप्त मेजर जनरल तथा पूर्व खेलाडी भिक्टर राणाले अखिल नेपाल फुटबल संघका महासचिव इन्द्रमान तुलाधरलाई प्रतिवेदन बुझाएका हुन् । कार्यदलले २८ पृष्ठ लामो प्रतिवेदनमा ९ बुँदे सुझाव समेट्दै प्रतिवेदन बुझाएको हो । 

वैशाख २५ गते गठित कार्यदलले एन्फा अध्यक्ष कर्माछिरिङ शेर्पा, महासचिव तुलाधर, खेलाडी, मुख्य प्रशिक्षक अल्मुताइरी, टिम व्यवस्थापक लगायतसँग सोधपुछ गरेको थियो ।

एएफसी एसियन कप, २०२३ छनोटको तयारीमा रहेको राष्ट्रिय फुटबल टोलीका महत्त्वपूर्ण १० खेलाडीले वैशाख १३ गते राति टिम बसेको होटेल छाडेका थिए । त्यसपछि उनीहरूले वैशाख १५ गते पत्रकार सम्मेलन गर्दै मुख्य प्रशिक्षक अल्मुताइरीको ज्यादतीका कारण टिम छाड्नुपरेको बताएका थिए । उनीहरूले आफूले टिम छाडेको नभई छाड्न लगाइएको गुनासो गर्दै आएका छन् । 

खेलाडीहरूले वैशाख १९ गते एन्फालाई पत्र बुझाएर छानबिन गरी दोषीलाई कारबाही गर्न अनुरोध गरेका थिए । त्यसअघि, मुख्य प्रशिक्षक अल्मुताइरीले पनि वैशाख १८ गते एन्फा महासचिवलाई पत्र लेख्दै खेलाडीको गल्तीमा माफी दिन आग्रह गरेका थिए ।

राष्ट्रिय तथा अन्तर्राष्ट्रिय खेलाडी संघले पनि वैशाख २३ गते एन्फा अध्यक्ष कर्माछिरिङ शेर्पालाई ज्ञापनपत्र बुझाउँदै विवादको सत्यतथ्य छानबिन गरी दोषीलाई कारबाहीको दायरामा ल्याउन माग गरेको थियो ।