काठमाडौं । आम निर्वाचन पर्यवेक्षण समिति (जियोक)ले  निर्वाचनमा मतदाताहरुको उपस्थिति उल्लेख्य र उत्साहजनक रहेको बताएको छ । शुक्रबार मध्यान्ह गरेको पत्रकार सम्मेलनमा काठमाडौं उपत्यकाका तीन जिल्ला काठमाडौं, भक्तपुर र ललितपुरका निर्वाचन पर्यवेक्षकहरुले शान्तिपूर्ण रुपमा चुनाव भइरहेको बताएका छन् । 

पत्रकार सम्मेलनमा पूर्व प्रधानन्यायाधीश एवं स्थानीय निर्वाचन ०७९ का पर्यवेक्षक कल्याणकुमार श्रेष्ठले शाीन्तपूर्ण रुपमा निर्वाचन भइरहेको बताए । उनले राजनीतिक दलहरुले पनि संयमता अपनाएर निर्वाचनमा सहभागी भएको र आम मतदाताले पनि संयमता अपनाएको उल्लेख गरे । 

उनले मतदानमा सहभागी हुनेमा ज्येष्ठ नागरिक, महिला र अपाङ्ग पनि उल्लेख्य रहेको पाइएको बताए । उनले अपाङ्गमैत्री मतदानस्थल नभएकाले त्यसलाई आगामी दिनमा सुधार गर्नुपर्ने बताए । 

उनले करिब ८० प्रतिशत मतदाताले मतदाता परिचयपत्र लिएर मतदान गर्न आएको बताए ।  पर्यवेक्षक श्रेष्ठले काठमाडौं जिल्लाका विभिन्न मतदान केन्द्रहरुको अवलोकन तथा निरीक्षण गरेका हुन् । 

पूर्व प्रधान्यायाधीश तथा पर्यवेक्षक सुशीला कार्कीले भक्तपुरका विभिन्न ९ मतदान केन्द्रहरुको अवलोकन गरेकी थिइन् । जसक्रममा मध्यान्ह १२ बजेसम्म अधिकांश स्थानमा महिला निर्वाचन अधिकृत पाइएको बताइन् ।