काठमाडौं । यही वैशाख ३० गते हुने स्थानीय तह निर्वाचनका लागि छिमेकी देश भारतमा श्रम गर्न पुगेका नेपाली फर्कने क्रम बढ्न थालेको छ । कञ्चनपुरको पश्चिमी सीमानाका गड्डाचौकीबाट घर फर्कने नेपालीको संख्या दिनदिनै बढ्न थालेको हो ।

गड्डाचौकी नाकाबाट अरू सामान्य अवस्थामा दैनिक १०० देखि २०० नेपाली भारतबाट घर फर्कने गरेकामा अहिले उक्त संख्या बढेर दैनिक ८०० सम्म पुगेको छ ।

कञ्चनपुरको गड्डाचौकी हेल्थ डेस्कका इन्चार्ज विकास भट्टले अहिले दैनिक ५०० देखि ८०० सम्म मानिस नेपाल फर्किरहेको र यो संख्या बढ्दो क्रममा रहेको बताए ।

भारतबाट नेपाल फर्कनेको संख्या बढेपछि गड्डाचौकी नाकामा डाटा संकलन गर्ने कार्य भइरहेको छ । पछिल्लो समय भारतमा कोरोना संक्रमण बढिरहेकाले नेपाल आउनेहरूले अनिवार्य सात दिन क्वारेन्टिनमा बस्न र स्वास्थ्य सुरक्षाका मापदण्ड अनिवार्य पालना गर्न स्वास्थ्य मन्त्रालयले आग्रह गरेको छ ।

नेपालमै रोजगारी सिर्जना गरेर विदेश जानुपर्ने बाध्यताबाट मुक्त गर्नुपर्ने भारतबाट फर्किएका नागरिकको माग छ ।