काठमाडौं । नेपाली राष्ट्रिय टोलीका मुख्य प्रशिक्षक अब्दुल्लाह अल्मुताइरी र खेलाडीबीचको विवाद समाधान गर्न अखिल नेपाल फुटबल संघ (एन्फा)ले बुधबार छानबिन समिति गठन गर्ने भएको छ । 

मंगलबार खेलाडी र एन्फा अध्यक्ष कर्माछिरिङ शेर्पाबीच भएको छलफलपछि दुवै पक्ष छानबिन समिति गठन गर्न राजी भएका हुन् । एन्फा मुख्यालयमा भएको छलफलपछि अध्यक्ष शेर्पाले भने, ‘‘भोलि छानबिन समिति गठन गर्ने र त्यसले चार दिनभित्र निष्कर्ष निकाल्नेमा खेलाडी सहमत भएका छन् ।’’

छानबिन समिति गठन गर्ने भए पनि कसको संयोजकत्व र कति सदस्यीय समिति बनाउने भन्नेबारे अध्यक्ष शेर्पाले केही खुलाउन चाहेनन् । अध्यक्ष शेर्पालाई भेट्नुअघि राष्ट्रिय टोलीबाट निस्किएका दश खेलाडीले आजै राष्ट्रिय खेलकुद परिषद् (राखेप)का सदस्यसचिव टंकलाल घिसिङलाई भेटेका थिए । 

त्रिपुरेश्वरस्थित राष्ट्रिय खेलकुद परिषद्मा सदस्यसचिव घिसिङलाई भेटेर निस्कने वित्तिकै खेलाडीहरू सिधै एन्फा पुगेका थिए । खेलाडीहरूले सदस्यसचिवलाई भेट्नुअघि राष्ट्रिय तथा अन्तर्राष्ट्रिय खेलाडी संघलाई विवाद समाधानका लागि पहल गरिदिन अनुरोध गरेका थिए । 

खेलाडीहरूले वैशाख १९ गते एन्फालाई पत्र बुझाएर छानबिन गरी दोषीलाई कारबाही गर्न अनुरोध गरेका थिए । त्यसअघि मुख्य प्रशिक्षक अल्मुताइरीले पनि वैशाख १८ गते एन्फा महासचिवलाई पत्र लेख्दै खेलाडीको गल्तीमा माफी दिन आग्रह गरेका थिए । 

राष्ट्रिय फुटबल टोलीका महत्वपूर्ण १० खेलाडीले वैशाख १३ गते राति टिम बसेको होटल छाडेका थिए । त्यसपछि उनीहरूले वैशाख १५ पत्रकार सम्मेलन गर्दै मुख्य प्रशिक्षक अल्मुताइरीको ज्यादतीका कारण टिम छाड्नु परेको बताएका थिए ।