काठमाडौं । वायुसेवा सञ्चालक संघले राति ८ बजेपछिका नियमिततर्फका उडान तत्काल गर्न सक्ने अवस्था नरहेको जनाएको छ । नेपाल नागरिक उड्डयन प्राधिकरणले रात्रिकालीन उडान भइरहेका विमानस्थलहरूमा बिहीबारदेखि लागु हुनेगरी बिहान ६ देखि राति १२ बजेसम्म १८ घण्टा कायम गरेको थियो ।

तर, संघका सदस्य वायुसेवा कम्पनीहरू बुद्ध एयर, यती एअरलाइन्स, श्री एयरलाइन्स, सौर्य एअरलाईन्स र गुण एयरलाइन्सले विविध प्राविधिक कारणले हाललाई राति ८ बजे पछिका नियमिततर्फका उडानहरू गर्न सक्ने अवस्था नरहेको जनाएका हुन् ।

संघले यसबारे अन्य पूर्वाधार र सम्भावनासम्बन्धी विस्तृत छलफल गर्न प्राधिकरणसँग समयसमेत माग गरिएको अवस्थामा प्राधिकरणले बुधबार जारी गरेको स्लटसम्बन्धी नयाँ व्यवस्थाअनुरूपको तालिका संलग्न गर्न सदस्य वायुसेवा कम्पनीहरूले नसक्ने स्पष्ट पारेको छ ।

संघले वैशाख ३ गतेकै स्लट सम्बन्धी व्यवस्था हाललाई लागू गर्न प्राधिकरणलाई आग्रह गरेको छ ।

संघको मागअनुसारको उडान अनुमति प्राप्त नभए संघका सदस्य वायुसेवा कम्पनीहरू बुद्ध एयर, यती एअरलाइन्स, श्री एयरलाइन्स, सौर्य एअरलाइन्स र गुण एयरलाइन्सका उडानहरू स्लट संशोधन नभएसम्मका लागि सम्पूर्ण उडानहरू स्थगन गर्ने चेतावनी दिइएको छ ।