काठमाडौं । क्यान इन्फोटेक २०२२ को पाँचौ दिन सूचना प्रविधि सम्बन्धी कलेज तथा स्टार्टअप एवं इनोभेसनमा अवलोकनकर्ताको आकर्षण देखिएको छ ।

गत बुधवारदेखि काठमाडौंको भृकुटीमण्डपमा सुरु भएको ‘आईएमई–पे क्यान इन्फोटेक, २०२२ इन एसोसिएसन विथ स्मार्ट क्युआर’ सोमवार सकिँदैछ । इन्फोटेकको अन्तिम दिन आईसीटी एक्सेसेरिज र अन्य विभिन्न स्टलहरूमा विशेष छूट तथा अफरहरूको व्यवस्था गरिएको आयोजकले जनाएको छ ।

इन्फोटेकमा विद्यार्थीद्वारा निर्मित सेन्सरमा आधारित उपकरणहरू, थ्रीडी प्रिन्टीङ्ग, मान्छेको क्रियाकलापमा आधारित इलेक्ट्रोनिक्स चार्जिङ्ग, तीन पाङ्ग्रे गाडी, ड्रोन, साइकल रहेको स्टलहरूमा विद्यार्थी एवं अवलोकनकर्ताहरूको आकर्षण देखिन्थ्यो ।

सूचना तथा सञ्चार प्रविधि सम्बन्धी चासो राख्ने सर्वसाधारणदेखि पूर्वराजदूत, पूर्वसचिव र राष्ट्रियस्तरका कलाकाहरूले इन्फोटेक भ्रमण गरेको कम्प्युटर एसोसिएसन नेपाल (क्यान महासंघ)ले जनाएको छ । आइतवार पूर्वराजदूत भागीरथ बस्नेत, पूर्वसचिव इन्जिनियर हरी राम कोइराला, नायिका सुष्मा कार्की, चर्चित हास्य कलाकारहरु दीपाश्री निरौला, जितु नेपाल ‘मुन्द्रे’ र सागर लम्साल ‘बले’, र्याप गायक राजेन्द्र भट्ट ‘मिस्टर आरजे’ लगायत अन्य व्यक्तिहरूले पनि क्यान अवलोकन गरेका छन् ।

हरेक दिन कुनै न कुनै स्टलले नयाँ–नयाँ वस्तु तथा सेवा सार्वजनिक गरिरहेको प्रदर्शनी सोमवार अझ विशेष रहने महासंघका महासचिव नारायण थापाले बताए ।