काठमाडौं । नेपाल प्रेस युनियन सुनसरीलाई नेपाली कांग्रेस सुनसरीका नेता रोहित प्रसाईंले जग्गा प्रदान गरेका छन् । प्रेस युनियनको आफ्नै भवन निर्माणका लागि प्रसाईंले छ धुर जग्गा प्रदान गरेका हुन् ।

सोमबार बिहान प्रसाईंले जग्गाको धनीपूर्जा प्रेस युनियन सुनसरी अध्यक्ष पवन अधिकारीलाई हस्तान्तरण गरे । उनले प्रेसयुनियनका गतिविधि आफ्नै भवनमा सञ्चालन गर्न आफूले जग्गा प्रदान गरेको भन्दै भवन निर्माणको काम तुरुन्तै सुरु हुने विश्वास व्यक्त गरे । 

नेपाल प्रेस युनियनको ७७ जिल्लामध्ये चितवनमा मात्रै आफ्नै भवन छ । प्रेस युनियन सुनसरीका अध्यक्ष पवन अधिकारीले अब सुनसरीको पनि आफ्नै भवन हुने बताए ।

अध्यक्ष अधिकारीले भने, “नक्सा बनाउने काम भइरहेको छ, दुई वर्षभित्रमा भवन सक्नेगरी जतिसक्दो चाँडो काम सुरु गर्छौं ।”