काठमाडौं । प्रतिनिधिसभाको सोमबार बिहानको बैठक मन्त्रीको अनुपस्थितिका कारण रोकिएको छ । बैठक सुरु हुनुअघि मन्त्री सभामुख देवराज घिमिरेको सम्पर्कमा पुगेका थिए । बैठक सुरु हुँदा भने मन्त्री सदनमा देखिएनन् ।

बैठक सुरु हुँदा कोही मन्त्री उपस्थित नभएको देखिएपछि प्रमुख प्रतिपक्ष दल नेपाली कांग्रेसका सांसद रामकृष्ण यादवले सभामुखको ध्यानाकर्षण गराएका थिए । 

“सभामुख महोदय, सदनको काम–कारबाही सुुरु हुँदा एकजना पनि मन्त्री उपस्थित हुनु हुन्न,” यादवले भने, “नेपाल सरकारको अनुपस्थितिमा सदनको बैठक सञ्चालन हुन सक्दैन । त्यसैले ध्यानाकर्षण गराउन चाहन्छु ।”

यादवले प्रश्न उठाएपछि सभामुख घिमिरेले बैठक रोकेका हुन् । “माननीयज्यू, ध्यानाकर्षण भयो । अब यो बैठक १५ मिनेका लागि स्थगित हुन्छ,” सभामुख घिमिरेले भने ।

सम्पर्कमा आएका मन्त्री कहाँ हराए ?
संघीय संसद् सचिवालय स्रोतका अनुसार, खानेपानीमन्त्री राजेन्द्र राई संसद् बैठक सुरु हुनुअघि नै सभामुखको सम्पर्कमा पुगेका थिए । उनी आएको देखेकाले सभामुखले बैठक सुरु हुनुअघि मन्त्री उपस्थित रहे/नरहेको खोजी गर्नु परेन । बैठक सुरु हुँदा भने मन्त्री राईलाई नदेखेपछि सभामुख अप्ठ्यारोमा परेका थिए ।

सचिवालय स्रोतका अनुसार, खानेपानीमन्त्री राईलाई संसद्को घण्टी बजिसकेपछि शौच लागेछ । शौचालय गएकाले बैठकको काम–कारबाही सुरु हुँदासम्म उनी प्रधानमन्त्री तथा मन्त्रीहरूका निम्ति छुट्ट्याइएको केन्द्रभागको रोमा पुग्न भ्याएनन् । मन्त्री अनुपस्थितिका विषयमा प्रमुख प्रतिपक्षले स्वाभाविक प्रश्न उठायो र बैठक स्थगित गरियो ।