काठमाडौं । साताको दोस्रो कारोबार दिन (सोमबार) सेयर बजार परिसूचक नेप्सेमा ०.६९ प्रतिशतले वृद्धि भएको छ । पछिल्लो तीन करोबार दिन  लगातार दोहोरो अंकको  गिरावट भएको नेप्से सोमबार १७.९९ अंकले वृद्धि भएर २६३४.५४ अंकमा बन्द भएको छ ।
 
नेप्सेसँगै होटेल तथा पर्यटन र अन्य बाहेक सबै उपसूचकमा वृद्धि भएको छ ।  नेप्सेमा सुधार हुँदा आइतबारको तुलनामा कारोबार रकम पनि बढेको छ । आज बजारमा २ अर्ब  ५९ करोडको कारोबार भएको छ । 

आज बजारमा नेपाल दुरसञ्चार कम्पनीको  सवार्धिक करिब २० करोड ९५ लाखको सेयर कारोबार भएको छ । यस्तै  अरुण भ्याली हाइड्रोपावरको ९ करोडको कारोबार हुँदा जीवन विकास लघुवित्तको पनि ९ करोडको कारोबार भएको छ ।

आज दिनभर बजारमा १९२ कम्पनीको सेयर कारोबारमा आएकोमा १५६ कम्पनीको  सेयरमूल्य वृद्धि हुँदा ३१ कम्पनीको सेयरमूल्य घटेको छ । ५ कम्पनीको  मूल्य स्थिर छ । 

आज कारोबार भएकोमध्ये इमर्जिङ नेपालको सेयरमूल्य बढेर सकारात्मक सर्किट लेभलमा बन्द हुँदा ङ्याली ग्रुप पावरको ७.६७ प्रतिशत र माउन्टेन हाइड्रो नेपाल ६.७४ प्रतिशतले बढेको छ ।

यता, लाभांश घोषणापछि नेपाल दुरसञ्चार कम्पनीको सेयरमूल्य भने लगातार घटिरहेको छ । २० प्रतिशत बोनस सेयरसहित ४० प्रतिशत लाभांश घोषणा गरेको कम्पनीको  सेरमूल्य लाभांश गरेयता २०० रुपैयाँभन्दा बढीले गिरावट भइसकेको छ । सोमबार पनि कम्पनीको सेयरमूल्य २.९७ प्रतिशतले गिरावट भएको छ ।