पोखरा । उमेर पुगेपछि विवाह गर्छु भनेर नाबालिगमाथि जबरजस्ती करणी गरेको आरोपमा चिनियाँ नागरिक ली झियुआन यतिबेला पुर्पक्षका लागि थुनामा छन् ।

पोखरा ६ स्थित एक नाबालिगालाई उनले जबरजस्ती करणी गरेको भन्दै पीडितकी आमाले गत माघ २४ गते जाहेरी दिएकी थिइन् । सोही जाहेरीको आधारमा कास्की प्रहरीले पक्राउ गरी अनुसन्धान थालेको थियो ।

प्रहरीकाअनुसार उनले माघ २ गते राति ८ बजे पीडितको डेरामा नै पुगेर करणी गरेका थिए । प्रहरीले अनुसन्धानपछि फागुन १५ गते मुलुकी अपराध संहिता २०७४ को दफा २१९ (३) को 'ङ' बमोजिम कैद सजाय माग गर्दै सरकारी वकिलको कार्यालयमा प्रतिवेदन बुझाएको थियो ।

फागुन २० गते अदालतमा उपस्थित गराइएका झियुआनको मुद्दामाथि जिल्ला अदालत कास्कीले २१ गते पुर्पक्षका लागि थुनामा राख्न आदेश दिएको थियो । जिल्ला अदालत कास्कीका न्यायधीश विष्णुप्रसाद उपाध्यायको इजलाससमक्ष झियुआनले विवाह गरेको तर, करणी नगरेको इन्कारी बयान दिएका छन् ।

थुनछेक बहसमा उनले भनेका छन्, “पीडितसँग मेरो हिन्दु संस्कारअनुसार विवाह भएको । करणी गरेको होइन ।”

उनले पीडितसँग फोन, फेसबुकमा कुराकानी गर्ने गरेको बताएका छन् । विवाह नै गरिसकेको र विवाहपछि पीडितलाई फ्ल्याट खोजेर राखेको उनको बयान छ । तर, करणी गरेको भने उनले स्वीकार गरेका छैनन् ।

पीडितको शारीरिक परीक्षण, कागजातका आधारमा उनी निर्दोष रहेको मान्न नमिल्ने उल्लेख गर्दै उनलाई पुर्पक्षका लागि थुनामा पठाउने आदेश दिइएको थियो ।

“तत्काल प्राप्त प्रमाण बुझ्दै जाँदा ठहरेबमोजिम हुने नै हुँदा हाललाई प्रतिवादी ली झियुआनलाई मुलुकी फौजदारी कार्यविधी संहिता, २०७४को दफा ६७ (१) ख र (२) ख बमोजिम मुद्धा पुर्पक्षको लागि थुनामा राख्नको लागि दफा ८० बमोजिम थुनुवा पुर्जी दिई थुनामा राख्नको लागि जिल्ला कारागार कार्यालय कास्कीमा पठाइदिनु...,” आदेशमा भनिएको छ ।