काठमाडौं । नेपाल सुपर लिगको दोस्रो संस्करणका लागि आउँदो शुक्रबार खेलाडीको अक्सन गरिँदै छ । प्रतियोगिताका टोलीले प्रशिक्षक र मार्की खेलाडी लगभग टुंगो लगाएका छन् ।

प्रतियोगिताका पुराना सात टोलीले प्रशिक्षक र मार्की खेलाडी लगभग टुंगाइसकेका छन् । तर, नयाँ टिम स्पोर्टिङ इलाम दी मेची, वीरगन्ज युनाइटेड र झापा फुटबल क्लबले भने अझै प्रशिक्षक र मार्की खेलाडी टुंगो लगाउन सकेका छैनन् । अक्सन हुन दुई दिन पनि बाँकी छैन । तर, क्लबहरूले मुख्य प्रशिक्षक र मार्की खेलाडीको नाम खुलाउन चाहेका छैनन् ।

प्रतियोगिता आउँदो अप्रिल ९ देखि मे २१ सम्म हुने आयोजकले जनाएको छ । यद्यपि, प्रतियोगिता अप्रिल ६ देखि सुरु हुने भनिएको छ । आयोजक नेपाल सुपर लिगले अक्सनका लागि २४० भन्दा धेरै खेलाडीको नाम तय गरेको छ । खेलाडीलाई तीन श्रेणीमा वर्गीकरण गरिएको छ । ‘ए’ श्रेणीमा ४० खेलाडी छन् भने ‘बी’ र ‘सी’ श्रेणीमा समान १०० खेलाडी छन् ।

अघिल्लो सिजन एक टिममा २० खेलाडी राख्न दिइएको थियो । यसपटक २३ खेलाडी अनुबन्ध गर्न पाउनेछन् । विदेशी खेलाडीको हकमा गत संस्करणमा तीन खेलाडी मात्र थिए । त्यसलाई बढाएर पाँच बनाइएको छ । तीमध्ये एकपटकमा चार खेलाडीले खेल्न पाउनेछन् । २२ मार्की खेलाडीको सूची बनाइएको थियो । मार्की खेलाडी हुन नसकेका खेलाडीलाई पनि अक्सनमा बोली लाग्ने आयोजकले जनाएको छ ।

गत वर्ष उपाधि जितेको काठमाडौं रेजर्सले योपटक पनि बालगोपाल महर्जनलाई मुख्य प्रशिक्षकमा निरन्तरता दिएको छ । मार्की खेलाडीमा पनि विकेश कुथुलाई निरन्तरता दिएको छ । गत सिजन काठमाडौंले धनगढी एफसीलाई १–० ले हराउँदै उपाधि जितेको थियो ।

त्यस्तै, उपविजेता धनगढीले युगलकिशोर राईलाई मुख्य प्रशिक्षकको जिम्मेवारी दिएको छ । गत सिजन राईले फुजा तोपेको सहायकका रूपमा काम गरेका थिए । धनगढीले गत सिजनका मार्की खेलाडी विशाल राईलाई नै निरन्तरता दिएको छ ।

धनगढीको मुख्य प्रशिक्षक रहेका फुजा तोपेले योपटक चितवन एफसीको जिम्मेवारी सम्हाल्ने भएका छन् । चितवनले अनन्त तामाङलाई मार्की खेलाडीका रूपमा अनुबन्ध गरेको छ । थ्री स्टार क्लबबाट सहिद स्मारक ‘ए’ डिभिजन लिग खेलेका अनन्त भारतको इन्डियन सुपर लिगको क्लबमा अनुबन्ध हुने पहिलो नेपाली खेलाडी हुन् । उनी अहिले भारतमा छन् । गत सिजन चितवनले भरत खवासलाई मार्की खेलाडी बनाएको थियो ।

गत सिजन चितवन एफसीको जिम्मेवारी सम्हालेका मेघराज केसी भने योपटक नयाँ क्लब स्पोर्टिङ इलाम दी मेचीसँग अनुबन्ध भएका छन् । इलामले तेज तामाङलाई मार्की खेलाडीका रूपमा राख्ने सम्भावना बलियो छ । अर्का खेलाडी नवयुग श्रेष्ठको चर्चा भए पनि उनी चोटबाट गस्रित भएकाले तेजको सम्भावना बलियो छ । यद्यपि, तेजलाई पनि काठमाडौंले छाड्न चाहेको छैन ।

मच्छिन्द्र फुटबल क्लबलाई लगातार दोस्रोपटक सहिद स्मारक ‘ए’ डिभिजन लिगको उपाधि जिताउन सफल प्रवेश कटवाल भने ललितपुर सिटीसँग आबद्ध भएका छन् । ललितपुरले गत सिजन प्रदीप हुमागाईंलाई मुख्य प्रशिक्षक बनाएको थियो ।

ललितपुरले विमल घर्तीमगरलाई मार्की खेलाडीका रूपमा अनुबन्ध गरेको छ । ललितपुरले गत सिजन अञ्जन विष्टलाई मार्की खेलाडी बनाएको थियो । अञ्जन योपटक नयाँ क्लब झापा एफसीको मार्की खलाडी बनेका छन् ।

बुटबल लुम्बिनी एफसीले मार्की खेलाडीमा विशाल श्रेष्ठलाई योपटक पनि निरन्तरता दिएको छ । तर, मुख्य प्रशिक्षकमा भने परिवर्तन गरेको छ । गत सिजन सनोज श्रेष्ठले बुटवल लुम्बिनी हेरेका थिए । योपटक अनन्तराज थापाले बुटबल लुम्बिनीको जिम्मेवारी सम्हाल्नेछन् । अनन्त सहिद स्मारक ‘ए’ डिभिजन लिगमा नेपाल पुलिस क्लबका प्रशिक्षक थिए ।

पोखरा थन्डर्सले नवीन न्यौपानेलाई निरन्तरता दिने भएको छ । पोखराले सुजल श्रेष्ठलाई मार्की खेलाडी बनाएको छ । गत सिजन पोखराले नवयुग श्रेष्ठलाई मार्की खेलाडी बनाएको थियो ।

विराटनगरले विष्णु गुरुङलाई मुख्य प्रशिक्षक बनाएको छ । विष्णुले ‘ए’ डिभिजन लिगमा संकटाको जिम्मेवारी सम्हालेका थिए । गत वर्ष भारतका यान ल विराटनगरका मुख्य प्रशिक्षक थिए । विराटनगरले रञ्जित धिमाललाई मार्की प्लेयरमा निरन्तरता दिएको छ ।

अर्को नयाँ क्लब वीरगञ्जको भने केही कुरा बाहिर आएको छैन । यद्यपि, सुनील बल वीरगञ्जको मार्की खेलाडी हुने सम्भावना छ ।