काठमाडौं । नेपाल प्रिमियर लिग (एनपीएल)को पहिलो क्वालिफायरमा आज सुदूरपश्चिम रोयल्सविरुद्ध मैदान उत्रिँदा जनकपुर बोल्ट्स लिग चरणमा व्यहोरेको हारको बदला लिने लक्ष्यमा हुनेछ ।

यी दुई टिमबीच लिग चरणमा भएको खेलमा दीपेन्द्रसिंह ऐरीको कप्तानीमा रहेको सुदूरपश्चिमले जनकपुरविरुद्ध ७२ रनको सहज जित निकालेको थियो ।

लिग चरणमा शीर्ष स्थान हासिल गरेको सुदूरपश्चिमले सात खेलबाट १२ अंक जोेडेको थियो । समान खेलबाट १० अंक जोडेको जनकपुर दोस्रो स्थानमा रहँदै प्लेअफमा आइपुगेको हो । आजको खेलमा जित निकाल्ने टिमले सोझै फाइनल यात्रा तय गर्नेछ । यता, पराजित हुने टिमले भने इलिमिनेटर विजेतासँग दोस्रो क्वालिफायरमा प्रतिस्पर्धा गर्नेछ ।

प्लेअफअघि जनकपुरले भने नियमित कप्तान अनिल साहको साथ नपाउने सम्भावना उच्च छ । अनिल लिग चरणमा आफ्नो अन्तिम खेलमा चितवन राइनोजविरुद्ध मैदान उत्रिँदा घाइते भएका थिए । उनको हातमा चोट लागेको छ । यसैकारण उनले प्रतियोगिता नै गुमाउने सम्भावना उच्च रहेको एक स्रोतले बाह्रखरीलाई बताए ।

कीर्तिपुरस्थित त्रिवि क्रिकेट मैदानमा हुने यो खेल दिउँसो १ बजेदेखि सुरु हुनेछ ।

लिग चरणका नतिजा
जनकपुरले प्रतियोगिताको सुरुआती चार खेलमा लगातार जित निकालेको थियो । तर, लिग चरणका अन्तिम तीन खेल खेल्दा भने जनकपुरले दुई खेलमा हार व्यहोरेको हो ।

जनकपुरले पहिलो खेलमा विराटनगर किंग्सविरुद्ध आठ विकेटको, दोस्रो खेलमा कर्णाली याक्सविरुद्ध पनि आठ विकेटको नै, तेस्रो खेलमा पोखरा एभेन्जर्सविरुद्ध सात विकेटको र चौथो खेलमा लुम्बिनी लायन्सविरुद्ध एक रनको जित निकालेको थियो । पाँचौँ खेलमा भने जनकपुरले सुदूरपश्चिम रोयल्सविरुद्ध ७२ रनको हार व्यहोरेको हो । छैटौँ खेलमा काठमाडौंविरुद्ध पाँच विकेटको जित निकालेको जनकपुरले सातौँ खेलमा चितवन राइनोजसँग ३२ रनको हार व्यहोरेको हो ।

यता, लिगका सात खेलमध्ये ६ खेलमा जित निकालेको सुदूरपश्चिमलाई प्रतियोगिताकै सबैभन्दा सन्तुलित टिमको रूपमा समेत हेरिएको छ ।

लिगको आफ्नो पहिलो खेलमा सुदूरपश्चिमले विराटनगर किंग्सविरुद्ध ९० रनको, दोस्रो खेलमा काठमाडौं गुर्खाजविरुद्ध ७३ रनको र तेस्रो खेलमा लुम्बिनी लायन्सविरुद्ध ४५ रनको जित निकालेको थियो । चौथो खेलमा भने सुदूरपश्चिमले चितवन राइनोजविरुद्ध ३३ रनको हार व्यहोरेको थियो ।

यस्तै, पाँचौँ खेलमा सुदूरपश्चिमले जनकपुर बोल्ट्सविरुद्ध ७२ रनको, छैटौँ खेलमा पोखरा एभेन्जर्सविरुद्ध पाँच रनको र सातौँ खेलमा कर्णाली याक्सविरुद्ध ६ विकेटको जित निकालेको थियो ।