काठमाडौं । नेपाल प्रिमियर लिग (एनपीएल)मा आज प्लेअफको इलिमिनेटरमा चितवन राइनोज र कर्णाली याक्सबीच प्रतिस्पर्धा हुँदै छ ।

प्रतियोगिताको लिग चरणमा चितवनले तेस्रो र कर्णालीले चौथो स्थान सुनिश्चित गर्दै प्लेअफ यात्रा तय गरेका हुन् । यी दुई टिमबीच लिग चरणमा भएको खेलमा सोमपाल कामीको कप्तानीमा रहेको कर्णालीले चितवनविरुद्ध ६ विकेटको जित निकालेको थियो ।

आजको खेलमा जित निकाल्ने टिमले फाइनल प्रवेशका निम्ति दोस्रो क्वालिफायर खेल्ने मौका पाउने छ । पराजित हुने टिम भने प्रतियोगिताबाट बाहिरिने छ । आज जित निकाल्ने टिमले दोस्रो क्वालिफायरमा सुदूरपश्चिम रोयल्स र जनकपुर बोल्ट्समध्ये पराजित टोलीसँग प्रतिस्पर्धा गर्नेछ ।

कीर्तिपुरस्थित त्रिवि क्रिकेट मैदानमा हुने यो खेल बिहान ९ बजेदेखि सुरु हुनेछ ।

लिग चरणको नतिजा
चितवनले पहिलो खेलमा काठमाडौं गुर्खाजविरुद्ध पाँच र दोस्रो खेलमा पोखरा एभेन्जर्सविरुद्ध ८७ रनको जित निकालेको थियो । तेस्रो खेलमा कर्णाली याक्सविरुद्ध ६ विकेटले पराजित भएको चितवनले चौथो खेलमा सुदूरपश्चिम रोयल्सविरुद्ध ३३ रनको जित निकालेको थियो ।

पाँचौँ र छैटौँ खेलमा चितवनले लुम्बिनी लायन्स र विराटनगर किंग्सविरुद्ध क्रमशः ३३ र ५१ रनको हार बेहोरेको थियो । सातौँ खेलमा चितवनले जनकपुर बोल्ट्सविरुद्ध ३२ रनको जित निकालेको थियो ।

यता, कर्णालीले भने पहिलो र दोस्रो खेलमा जनकपुर बोल्ट्स र काठमाडौं गुर्खाजविरुद्ध क्रमशः आठ र तीन विकेटले पराजित भएको थियो ।

कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन, पाँचौँ खेलमा पोखराविरुद्ध सात विकेट र छैटौँ खेलमा लुम्बिनी लायन्ससँग पाँच रनको जित निकालेको थियो । सातौँ खेलमा भने कर्णालीले सुदूरपश्चिम रोयल्सविरुद्ध ६ विकेटको हार व्यहोरेको थियो ।