काठमाडौं । शिवरात्रिका दिन पशुपतिका चार किल्लामा मासु, मदिरा र नशालु पदार्थहरु उत्पादन, बेचविखन, ओसार प्रसार, भण्डारण र सेवन गर्न नपाइने भएको छ ।

शिवरात्रिलाई लक्षित गर्दै धार्मिक सांस्कृतिक मर्यादा एवं पवित्रता कायम राख्न जिल्ला प्रशासन कार्यालय काठमाडौंले एक सूचना जारी गर्दै सो गतिविधि गर्न निषेध गरेको हो ।

गौशला–मित्रपार्क सडकदेखि पूर्व, पशुपति क्षेत्रको पूर्व सीमानादेखि पश्चिम, गौशला तिलगंगा चक्रपथदेखि उत्तर र मित्रपार्क उमाकुण्ड गौरीघाट हुँदै वाग्मतीदेखि दक्षिण गरी चार किल्लामा यस्ता क्रियाकलाप गर्न निषेध गरिएको प्रशासनद्वारा जारी सूचनामा उल्लेख छ ।

स्थानीय प्रशासन ऐन २०२८ को दफा ६ उपदफा ३ को (क) र (ख) अनुसार मेलापर्व अवधि र अन्य समयमा समेत लागु हुनेगरी पूर्ण रुपमा रोक लगाइएको काठमाडौंका प्रमुख जिल्ला अधिकारी गोविन्दप्रसाद रिजालले जानकारी दिए ।  

कोही कसैले सूचनाको बर्खिलाप कुनै काम गरेमा स्थानीय प्रशासन ऐन, २०२८ अनुसार कडा कानुनी कारबाही गरिने प्रशासनले जनाएको छ ।