काठमाडौं । सहरी विकासमन्त्री रामकुमारी झाँक्रीले धोबीखोला करिडोरमा सडक ओगटेर राखिएका निर्माण सामग्री हटाउन निर्देशन दिएकी छन् । बुधबार धोबीखोला करिडोरको स्थलगत अनुगमन गर्दै मन्त्री झाँक्रीले सडकमा निर्माण समग्री राख्दा दोहोरो आवतजावतमा कठिनाइ भएको भन्दै सडक ओगटेर राखिएका निर्माण सामग्री हटाउन निर्देशन दिएकी हुन् ।

मन्त्री झाँक्रीले धोबीखोला करिडोरमा सडक र फुटपाथलाई खाली गर्न नियमित अनुगमन गर्ने पनि बताइन् ।

उनको निर्देशनपछि केही स्थानमा रहेका निर्माण सामग्रीलाई डोजर लगाएर काठमाडौं महानगरले हटाएको थियो । त्यस्तै उनले जथाभाबी पार्कीङ र फुटपाथका पसल पनि हटाउन निर्देशन दिइन् ।

मन्त्री झाँक्रीले धोबीखोला करिडोरमा सहज रूपमा सवारी आवतजावत हुनुपर्ने भन्दै अतिक्रमण भएका फुटपातलाई खाली गराउने बताइन् । त्यस्तै उनले फुटपाथ ओगटेर विद्युत प्राधिकरणले बनाएको संरचनालाई पनि हटाउन छलफल सुरु गर्ने बताइन् ।