![सुरक्षा परिषद् बैठकमा अमेरिकी र रुसी दूतबीच तनाव](https://12khari.top/uploads/posts/2------russia - ukrane tension - un1643764103.jpg)
न्युयोर्क । संयुक्त राष्ट्रसंघको सुरक्षा परिषद्को बैठकमा रुसी र अमेरिकी दूतहरूबीच आक्रोशपूर्ण भनाभन भएको छ । युक्रेनको सिमानामा रुसले आफ्नो एक लाख फौज तैनाथ गरेको विषयमा छलफल गर्न संयुक्तराज्य अमेरिकाले यो बैठक बोलाएको हो ।
अमेरिकी राजदूत लिन्डा थोमस ग्रिनफिल्डले दशकौँपछि पहिलोपटक यति धेरै संख्यामा सो क्षेत्रमा सैनिक परिचालित भएको देखिएको अभिव्यक्ति दिएकी छन् ।
लिन्डाका रुसी समकक्षीले अमेरिकाले रुसी मामिलामा पागलपन उक्साइरहेको र अस्वीकार्य किसिमको हस्तक्षेप गरिरहेको आरोप लगाएका छन् ।
अमेरिका र बेलायतले यदि रुसले युक्रेनमाथि आक्रमण गरेको खण्डमा रुसमाथि थप नाकाबन्दी लगाउने प्रतिबद्धता व्यक्त गरिसकेका छन् ।
![Global Ime bank](https://baahrakhari.com/uploads/bigyaapan/30885600.gif)
बेलायती विदेशमन्त्री लिज ट्रसले त्यो स्थितिमा क्रेमलिनको निकट रहेका थुप्रै व्यापार, व्यवसायलगायत व्यक्तिहरूमाथि नाकाबन्दी हुन सक्ने बताएकी छन् । एक अमेरिकी अधिकारीले वासिङटनको नाकाबन्दीको अर्थ क्रेमलिननिकटका व्यक्तिहरूलाई अन्तर्राष्ट्रिय आर्थिक प्रणालीबाट अलग्याइनु रहेको स्पष्ट पारेका छन् ।
रुसले सुरुदेखि नै युक्रेनमा हमला गर्ने आफ्नो कुनै योजना नरहेको अडान दोहोर्याउँदै आएको छ । युक्रेनको समस्या सुल्झाउन कूटनीतिक पहल पनि जारी रहेको छ । मंगलबार बेलुका (स्थानीय समय) अमेरिकी विदेशमन्त्री एन्टोनी ब्लिन्केनले रुसी समकक्षी सर्गेइ लाभ्रोभसँग वार्ता गर्ने भएका छन् ।
अमेरिकी विदेश मन्त्रालयका प्रवक्ताले अमेरिका अझै पूर्ण रूपमा वार्ताप्रति कटिबद्ध रहेको र अमेरिकाले निरन्तर रूपमा युक्रेनलगायत आफ्नो गठबन्धन र साझेदारहरूसँग पनि परामर्श जारी राख्ने जनाएका छन् । मंगलबार नै बेलायती प्रधानमन्त्री बोरिस जोन्सन पनि मस्कोसँगको समस्याको कूटनीतिक समाधान खोज्न युक्रेनी राष्ट्रपति भोलोदिमिर जेलेन्स्कीसँगको वार्ताका लागि युक्रेन प्रस्थान गर्दै छन् । बीबीसीबाट ।