काठमाडौं । नेपालमा प्रतिबन्धित भारतीय रुपैयाँसहित एकजना पक्राउ परेका छन् ।

बाराको जितपुरसिमरा उपमहानगरपालिका–१ स्थित सिमरा विमानस्थलबाट भारतको बिहार, नवाधा थाना अक्बरपुर बस्ने ३८ वर्षीय शिवशंकर बब्लु पक्राउ परेका हुन् । आइतबार बिहान प्रहरीले उनलाई नेपालमा प्रतिबन्धित दुई हजार दरका १०० थान गरी दुई लाख भारतीय रुपैयाँ नगदसहित पक्राउ गरेको हो ।

डिपार्चर रुममा काठमाडौंतर्फ जान लागेका यात्रुहरूलाई विमानस्थल सुरक्षा गार्डमा खटिएको प्रहरी टोलीले जाँच गर्ने क्रममा शिवशंकरलाई उक्त नगदसहित फेला पारी पक्राउ गरेको जनाइएको छ ।

उनलाई बरामद नगदसहित आवश्यक कारबाहीका लागि क्षेत्रीय राजस्व अनुसन्धान कार्यालय पठाइएको प्रहरीले जनाएको छ ।