काठमाडौं । इलामको सुकिलुम्बा विमानस्थलमा आउँदो फागुनदेखि हवाई सेवा सुरु हुने भएको छ ।

इलाम नगरपालिका र तारा एयर प्रालिबीच सुकिलुम्बा विमानस्थल सञ्चालन गर्ने विषयमा यही माघ ३ गते सम्झौता भएको थियो । सोही सम्झौताअनुरूप आउँदो फागुन ८ गतेदेखि प्रत्येक आइतबार काठमाडौंबाट सुकिलुम्बा विमानस्थलमा उडान–अवतरण हुने निश्चित भएको हो ।

सम्झौताअनुसार यो रुटमा उडान भर्न कम्तीमा ११ जना यात्रु हुनुपर्नेछ । १० जना यात्रु मात्रै भए एकजना बराबर यात्रुको शुल्क नगरपालिकाले ‘कम्पनसेट’ गर्ने नगरप्रमुख महेश बस्नेतले बताए । १६ यात्रु क्षमता सिट क्षमताको जहाज एकतर्फी भाडा आठ हजार ७०० रुपैयाँ तोकिएको छ ।

“कम्तीमा ११ जना यात्रु हुनुपर्छ भनिएको छ । एक उडानमा १० जना मात्रै यात्रु भए भने एकजना यात्रु बराबरको शुल्क नगरपालिकाले विमान कम्पनीलाई तिर्ने सहमति भएको छ,” उनले बाह्रखरीसँग भने ।

इलाममा हवाई सेवा सुरु भएपछि काठमाडौंसँगको निकटता अझ धेरै जोडिने उनले बताए । “आर्थिक, सामाजिक, सांस्कृतिक क्षेत्रमा यसले महत्त्वपूर्ण प्रभाव पार्छ भनेर नै नगरपालिकाले लगानी गर्न खोजेको हो । काठमाडौं हुँदै विश्वसँग अझ निकटता जोडिन्छ । अब इलाम विश्व समुदायसँग नजिकबाट जोडिन्छ भन्ने हामीले अनुमान गरेका छौँ,” उनले भने ।

इलाम प्रमुख पर्यटकीय स्थान हो । सन्दकपुर, माइपोखरी, कन्याम–अन्तु सर्किट, छिन्टापु, सानो पाथीभरा, सिद्धिथुम्का, माङ्मालुङ, माङ्सेबुङ, गजुरमुखी, रेडपाण्डा पाइने वन तथा इलाम सदरमुकाम, पशुपतिनगरलगायत यस क्षेत्रका आर्कषक पर्यटकीय केन्द्र हुन् ।

मेयर बस्नेतका अनुसार हालसम्म यहाँ हवाई सेवा प्रदान गर्न तारा एयर मात्रै इच्छुक देखिएको छ ।