काठमाडौं । साताको तेस्रो कारोबार दिन सेयर बजार परिसूचक नेप्सेमा उतार–चढावका बीच दोहोरो अंकको गिरावट भएर बन्द भएको छ ।

मंगलबार बजार परिसूचक नेप्से १०.७८ अंकले घटेर २९३६.६६ अंकमा बन्द भएको छ । नेप्सेमा गिरावट भए पनि  ‘क’ वर्गका कम्पनीहरूलाई मापन गर्ने ‘सेन्सिटिभ इन्डेक्स’ भने बढेको छ । सेन्सिटिभ इन्डेक्स १.१० अंकले बढेर ५४७.४७ अंकमा पुगेको छ ।

बजारलाई लिड गर्ने बैंकिङसहित होटेल तथा पर्यटन, अन्य र म्युचुअल फन्ड उपसूचकमा वृद्धि भएता पनि बिमा, हाइड्रोपावर, लघुवित्त, वित्त कम्पनी र विकास बैंक उपसूचमा गिरावट हुँदा नेप्सेमा समान्य गिरावट भएको हो । बैंकिङ, होटेल तथा पर्यटन, अन्य र म्युचुअल फन्ड उपसूचक १ प्रतिशतभन्दा माथिले बढेको छ ।

यता, विकास बैंक उपसूचक २.४७ प्रतिशत र वित्त कम्पनी उपसूचक  २.६१ प्रतिशत, व्यापार उपसूचक २.६३ प्रतिशत, लगानी उपसूचक २.३८ प्रतिशत, उत्पादनमूलक उपसूचक २.३९ प्रतिशतले गिरावट हुँदा जीवन बिमा, निर्जीवन बिमा र लघुवित्त उपसूचक १ प्रतिशतमाथिले गिरावट भएको छ ।

दोस्रो त्रैमासिक वित्तीय विवरण सार्वजनिक गर्ने तयारीमा रहेका केही वाणिज्य बैंकहरूले उत्कृष्ट विवरण सार्वजनिक गर्ने देखिँदा वाणिज्य बैंकको  सेयरमा लगानीकर्ता लोभिएका छन् । प्रभु बैंक, एनआईसी एशिया बैंक, एनसीसी बैंक, नेपाल एसबिआई  एनएमबीलगायत बैंक लगानीकर्ताको  रोजाइमा परेको छ ।

बजार परिसूचकमा करेक्सन भए पनि कराोबार रकम भने साढे ८ अर्बनजिक पुगेको छ । आज बजारमा १ करोड  ६० लाख ४ हजार ५३० कित्ता सेयर किनबेच हुँदा ८ अर्ब ४४ करोड ३४ लाख २० हजारको कारोबार भएको छ ।

आज पनि बजारमा लगानीकर्ताको रोजाइमा जलविद्युत् कम्पनी नै अगाडि रहेका छन् । अपी पावरको सर्वाधिक २८ करोडको सेयर कारोबार हुँदा  अरुण भ्याली हाइड्रोपावरको करिब २६ करोड र नेपाल दूरसञ्चार कम्पनीको २५ करोडभन्दा माथिको सेयर कारोबार भयो ।

आज नेप्सेमा कुल १८९ कम्पनीको सेयर कारोबारमा आउँदा ४५ कम्पनीको मात्रै सेयर मूल्य बढेको छ । यस्तै, १४१ कम्पनीको  सेयर मूल्यमा गिरावट भएको छ भने ३ कम्पनीको सेयर मूल्य स्थिर रहेको छ ।

आज कारोबार भएका मध्ये सामलिङ पावरको सेयर मूल्य ९.४९ प्रतिशत, मध्य भोटेकोसी जलविद्युत् कम्पनीको ८.११ प्रतिशत, बुद्धभूमि हाइड्रोपावरको ६.०८ प्रतिशत, प्रभु बैंकको ५.५६ प्रतिशत र वरुण हाइड्रोपावरको सेयर मूल्य ४.६६ प्रतिशतले वृद्धि भएको छ ।

यता, मानुषी लघुवित्तको सेयर मूल्य सर्वाधिक ५ प्रतिशतले गिरावट हुँदा  कर्पोरेट डेभलपमेन्ट बैंकको ४.६२ प्रतिशत, पञ्चकन्या माई हाइड्रोपावरको  ४.४७ प्रतिशत र खानीखोला हाइड्रोपावरको सेयर मूल्य ४.४० प्रतिशतले घटेको छ ।