काठमाडौं । ऊर्जा, जलस्रोत तथा सिँचाइमन्त्री दीपक खड्काले उद्योगको लाइन काट्ने कुरा समस्याको समाधान नभएको बताएका छन् । बुधबार औद्योगिक व्यापार मेला बुटवल–२०८१ को उद्घाटन गर्दै मन्त्री खड्काले यस्तो बताएका हुन् । सरकारले जुनसुकै बाटो अपनाएर पनि महसुल उठाउन सक्ने भन्दै उनले लाइन काटेर समस्याको समाधान नहुने उल्लेख गरे ।

साथै, व्यवसायीहरूको इमान्दारिताको आवश्यकता रहेको बताए । बिल लिने र पैसा दिने कुरालाई मुलुकमा चर्चाको विषय बनाइएको उनको भनाइ थियो । क्षणभरमा सकिने काम १०औँ वर्षदेखि अल्झाएर राखिएको बताए ।

"लाइन काट्ने कुरा समस्याको समाधान होइन । यदि महसुल उठाउनुपर्ने कुरा हो भने उठाउनका लागि सरकारले जुनसुकै बाटो अपनाएर पनि उठाउन सक्छ । म खाली के आग्रह गर्न चाहन्छु भने व्यवसायीहरूमा इमान्दारिताको आवश्यकता छ । १० वर्षदेखि किन यो विषय थाँती रह्यो । आज मुलुकमा चर्चाको विषय छ । जम्माजम्मी कुरा हो, उपभोग गरेको कुरा तिर्नपर्ने । बिल लिने, तिर्ने । जम्मा यति सानो विषय १० वर्षदेखि थाँती रहेर राष्ट्रिय विषय बन्यो । सदनमा चर्चा चल्यो । अचम्म लाग्छ मलाई," उनले भने, "प्राधिकरणको समस्या के हुन्, यसको छानबिन गर्न मन्त्रालयले कमिटी नै गठन गरेको छ ।"

मन्त्री खड्काले सबैले इमान्दारिताका साथ आफ्ना कर्तव्य पूरा गर्नुपर्ने बताए ।