विराटनगर । प्रदेश नम्बर–१ मा शनिबार कोरोना संक्रमितको संख्या अघिल्लो दिनभन्दा दोब्बर संख्यामा बढ्यो ।

सामाजिक विकास मन्त्रालयका अनुसार पीसीआर परीक्षण गरिएका मध्ये मोरङ र सुनसरीमा धेरै संक्रमित थपिएका थिए । यसअघि समेत झापा, मोरङ, सुनसरी र उदयपुरमा संक्रमणको चाप परेको थियो ।

पछिल्लो समय कोरोना संक्रमितको संख्या क्रमशः बढ्न थाले पनि कोरोनाप्रति बेवास्ता गर्ने क्रममा भने कमी आएको छैन । भारतीय सीमानाका जोगबनी हुँदै नेपाल प्रवेश गर्नेको एन्टिजेन परीक्षण गर्ने क्रम सुरु भए पनि पोजिटिभ देखिएका संक्रमितहरूको व्यवस्थापनमा पालिकाहरूले समेत खास चासो दिन छाडेका छन् ।

संघीय सरकारको लगानी र प्रदेश सरकारले झापा, दुहागढीमा व्यवस्थापन गरेको होल्डिङ सेन्टर सञ्चालनमा आउन सकेको छैन । निर्माणकार्य पूरा नभएकोले सञ्चालनमा आउन ढिलो भए पनि तेस्रो लहरभन्दा अगावै सुरु गर्ने तयारी रहेको आन्तरिक मामिला तथा कानुनमन्त्री केदार कार्कीले बताए । उनले भने, “माघ पहिलो साताबाट नै एक हजारजना अटाउने होल्डिङ सेन्टर सञ्चालन गर्दै छौँ ।”

डेल्टा भेरियन्टसको संक्रमण मत्थर भई संक्रमण घटेसँगै सर्वसाधारणमा कोरोना जोखिमप्रति बेवास्ता गर्ने क्रम बढेको थियो । अधिक भिड हुने सपिङ मल, सिनेमा हल, अस्पताल र सार्वजनिकस्थलमा स्याटिनाइजर प्रयोग गर्न छाडिएको छ । मास्क नलगाई सार्वजनिकस्थलमा जानेहरू पनि बढेका छन् ।

कोसी अस्पतालका चिकित्सक डा. लक्ष्मीनारायण यादव कोरोनाको विषयमा बढ्दो बेवास्ताका कारण संक्रमण तीव्र रूपमा फैलने सम्भावना बढेको बताउँछन् । उनले भने, “बारम्बार हात धुने, स्यानिटाइजर प्रयोग गर्ने र मास्क लगाउने बानी छाड्नु हुँदैन ।”

अहिले प्रदेश–१ मा सक्रिय संक्रमितको संख्या १९२ रहेको सामाजिक विकास मन्त्रालयले जनाएको छ । भारतीय सीमा क्षेत्रबाट मानिस निर्वाध आउने क्रमले नयाँ भेरियन्ट ओमिक्रोनको जोखिम बढाएको विराटनगर महानगरपालिकाको स्वास्थ्य महाशाखाले जनाएको छ ।

मुख्य नाकामा शरीरको तापक्रम नाप्ने र सम्भावित संक्रमितको एन्टिजेन परीक्षण गर्ने गरिएको भए पनि साना नाकामा भने यसको व्यवस्थापन हुनसकेको छैन ।

पछिल्लो समय राजनीतिक दलका अधिवेशनहरूमा हुने नेता–कार्यकर्ता र समर्थकको सहभागिताले समेत संक्रमणको जोखिमलाई बढावा दिएको छ । प्रदेश प्रयोगशालाले विराटनगरबाट नौवटा नमुना ओमिक्रोन हो वा होइन भन्ने पत्ता लगाउन जिन सिक्वेन्सिङका लागि काठमाडौं पठाइएको जनाएको छ ।