काठमाडौं । नेपाल प्रहरीको उपत्यका अपराध अनुसन्धान कार्यालयको टोलीले लालीगुराँस सहकारी संस्थाका अध्यक्षसहित चारजनालाई पक्राउ गर्‍यो । बचतकर्ताको रकम अपचलन गरेको उजुरीपछि सहकारीका अध्यक्ष अमरदास श्रेष्ठ, सचिव एवं प्रमुख कार्यकारी अधिकृत सुरेन्द्र भण्डारी पक्राउ परेका हुन् ।

कोषाध्यक्ष अमृतकुमार अर्याल र सञ्चालक सदस्य कदमबाबा जोशी प्रधानलाई समेत पक्राउ गरिएको कार्यालयका प्रमुख एवं एसएसपी सानुराम भट्टराईले जानकारी दिए । उनीहरूले तीन करोड रुपैयाँ ठगी गरेको उजुरी प्रहरीले पाएको एसएसपी भट्टराईले बताए ।

ललितपुरको पुल्चोकमा मुख्य कार्यालय रहेको लालीगुराँस सहकारीमा २२ हजार बचतकर्ताले ६ अर्ब ३० करोड रुपैयाँ जम्मा गरेका पाइएको छ । बचतकर्ताले रकम फिर्ता नपाएपछि गएको चैत १ मा जिल्ला प्रहरी कार्यालय ललितपुरमा जाहेरी दिएका थिए ।

प्रहरीले जाहेरी दर्ता गरी अनुसन्धान थालेदेखि भण्डारी लुकीछिपी बस्न थालेका थिए । उनीसहित सहकारीका नौजनामाथि अनुसन्धान गर्न प्रहरीले जिल्ला अदालत ललितपुरबाट पक्राउ अनुमति लिएको थियो । तीमध्ये प्रहरीले चारजनालाई शुक्रबार र शनिबार गरेर नियन्त्रणमा लिएको हो ।

चार महिनायता भण्डारी ललितपुर र काठमाडौंका विभिन्न ठाउँमा ‘सेल्टर’ बनाउँदै बसेका थिए । अन्ततः काठमाडौंको चुनदेवीस्थित एक रेस्टुरेन्टबाट उनलाई पक्राउ गरिएको प्रहरीले जनाएको छ । प्रहरीले भण्डारीलाई पक्राउ गरेपछि अरू तीनजनालाई नियन्त्रणमा लिएको थियो ।

बर्खास्तीका जिल्ला न्यायाधीशसँग मदिरा पिउँदै थिए भण्डारी
प्रहरीले सहकारीका प्रमुख कार्यकारी अधिकृत सुरेन्द्र भण्डारीलाई चैतदेखि खोजीको सूचीमा राखेर अनुसन्धान थालेको थियो । तर, करिब चार महिनासम्म उनी प्रहरीलाई छक्याउन सफल भए ।

प्रहरीको पन्जाबाट उम्कन उनी काठमाडौं र ललितपुरको भैँसेपाटीस्थित घरमा राति मात्र प्रवेश गर्थे । अधिकांश समय घरबाहिर बस्थे ।

प्रहरीले उनीमाथि पछिल्लो समय निगरानी बढाएको थियो । राजनीतिक दलका उपल्ला तहका नेतादेखि सुरक्षा निकायका अधिकारीसँग समेत भण्डारीको निकट सम्बन्ध छ ।

पछिल्लो समय भण्डारीलाई जसरी पनि पक्राउ गर्नुपर्ने दबाब प्रहरी अधिकारीलाई थियो । त्यसनिम्ति उक्त कार्यालयले प्रहरी नायब उपरीक्षक (डीएसपी) अनिल घिमिरेको नेतृत्वमा टोली परिचालन गरेको थियो ।

घिमिरेको कमान्ड र ललितपुर प्रहरीको टोलीले भण्डारी राति घर फर्कन सक्ने भन्दै निगरानी थालेको थियो । त्यो सूचना भण्डारीको कानसम्म पुग्यो । भण्डारीले उल्टै आफन्तमार्फत प्रहरीलाई घर फोड्ने तरिकाले ‘चोर’हरूले निगरानी गरेको सूचना दिए ।

त्यसपछि प्रहरी टोलीमाथि सोधपुछ गराउन प्रहरी प्रभाग भैँसेपाटीको कार्यालयमा फोन गयो । लगत्तै प्रहरीले भण्डरीको खोजी झन् तीव्र पार्‍यो ।

गएको शुक्रबार उनले काठमाडौंको चण्डोलस्थित एक कोरियन रेस्टुरेन्टमा मदिरा सेवन गर्दै गरेको सूचना प्रहरीले पायो । प्रहरी टोली त्यहाँ पुग्यो ।

अनुसन्धानमा खटिएका प्रहरीका अनुसार, त्यति बेला भण्डारी केही समयअघि मात्र न्याय परिषद्ले बर्खास्त गरेका एक जिल्ला न्यायाधीशसँग मदिरा सेवन गरिरहेका थिए । मदिरा सेवनका बेला प्रहरीले उनीमाथि सोधखोज गरेन । निगरानी मात्र गर्‍यो ।

सोही बेलुका साढे आठ बजेतिर उनी क्याप र मास्क लगाउँदै त्यहाँबाट निस्कन खोजे । त्यतिखेर प्रहरीको टोलीको सोध्यो, ‘तपाईं सुरेन्द्र भण्डारी हो ?’

भण्डारीको जवाफ थियो, ‘हो, म सुरेन्द्र हो । किन सोधेको ?’

त्यसपछि प्रहरी टोलीले उनलाई नियन्त्रणमा लियो । थप अनुसन्धान गर्न उनीहरूलाई ललितपुर प्रहरी कार्यालयमा पठाइएको छ ।

पक्राउ परेका अध्यक्ष श्रेष्ठ ३१ वर्ष नेपाल बैंक लिमिटेडमा काम गरी म्यानेजर पदबाट अवकाश पाएका कर्मचारी रहेको प्रहरीको प्रारम्भिक अनुसन्धानमा खुलेको छ । आरोपितविरुद्ध काठमाडौं प्रहरीमा समेत ठगीको उजुरी छ ।