काठमाडौं । चलचित्र ‘प्रेम गीत–३’को रिलिज डेट सरेको छ । फागुन १३ गते प्रदर्शन हुने भनिएको चलचित्रको प्रदर्शन मिति सारिएको निर्माता सन्तोष सेनले जानकारी दिए । 

“हामीले प्रेम गीत–३ को पोष्ट प्रोडक्सनको काम नेपाल लगायत मुम्बइका दिग्गज टिमहरुबाट सम्पन्न गरेका छौं । यसको पर्दशन मिति फागुन १३ गतेलाई लच्छित गरेर विभिन्न प्रचारप्रसार सामग्री तयार भएसँगै दर्शक माझ पस्कने तयारीमा थियाैँ,” सन्तोषले भने, “यसैक्रममा भारतीय वितरक समूहले दिएको सल्लाह र सिनेमा घरहरु बन्द हुने क्रम बढेको हुनाले नेपाल, भारत तथा विश्वभरी अलग–अलग मितिमा प्रदर्शन नगरी एकसाथ प्रदर्शन गर्नुपर्ने प्रस्ताव आएकाले त्यसलाई हामीले स्वीकार गरेका छौं ।” 

उनले प्रदर्शनको अर्को मिति अहिले नतोकिएको र कोरोना संक्रमणको त्रासलाई मध्यनजर गरेर तोकिने बताए । भारतमा पनि थिएटरमा रिलिज गर्ने भनिएको उक्त चलचित्र त्यहाँका धेरै स्थानमा सिनेमा हल बन्द भइसकेका कारण केही समयका लागि पछि हटेको हो ।