काठमाडौं । अंग्रेजी नयाँ वर्ष मनाउन जनकपुरमा भारतीय पर्यटकहरूको घुइँचो लागेको छ ।

भगवान्को दर्शन र पूजापाठ गरेर नयाँ वर्षको सुरुवात सुखमय होस् भन्ने अभिलाषाका साथ जनकपुरमा पर्यटकहरूको बाक्लो उपस्थिति देखिन्छ । शनिबार बिहानैदेखि जनकपुरका जानकी मन्दिर, राम मन्दिरलगायत धार्मिक मठमन्दिरहरूमा पर्यटकहरूको भिड लागेको छ । भारतीय गाडीहरूको चाप बढेको छ ।

महोत्तरीको जलेश्वर र धनुषाको जटही नाकाबाट ठूलो संख्यामा भारतीय पर्यटकहरू जनकपुर आएका छन् ।

अहिले जनकपुरका होटेलहरू पर्यटकले भरिभराउ छन् । जानकी मन्दिरका उत्तराधिकारी महन्थ रामरोशन दासले जानकी मन्दिरमा तीन-चार वर्षपछि ठूलो संख्यामा पर्यटक आएको भन्दै खुसी व्यक्त गरे ।

सन् १८९४ मा शिलान्यास भई सन् १९११ मा मुगल शैलीमा निर्माण सम्पन्न भएको मन्दिर नेपालको ख्यातिप्राप्त कलाको उत्कृष्ट नमुना मानिन्छ । सीताको जन्मभूमि रहेका कारणले समेत धार्मिक पर्यटकहरू जनकपुर आउने गरेका छन् ।