काठमाडौं । गृहमन्त्री रवि लामिछानेले राष्ट्रिय परिचयपत्र बनाउन छुटे पनि नागरिकले पाउने सेवा सुविधा वञ्चित नगरिने बताएका छन् ।

सोमबार प्रतिनिधिसभा बैठकमा सांसदका प्रश्नको जवाफ दिँदै उनले २८ जिल्लामा मात्र आउँदो भदौ मसान्तसम्म राष्ट्रिय परिचयपत्र बनाउनका निम्ति समय दिइएको जानकारी गराए ।

भदौ मसान्तसम्म पनि राष्ट्रिय परिचयपत्र बनाउन छुटेको अवस्थामा राज्यले दिने सेवा सुविधाबाट वञ्चित नगरिने उनले स्पष्ट पारे । सूचना पाउनासाथ सबैजना बनाउने जाने गर्दा सम्बन्धित कार्यालयमा भीडभाड बढेको भन्दै उनले हतार गर्नुपर्ने आवश्यकता नरहेको बताए ।

भीडभाड भएका स्थानमा अतिरिक्त जनशक्ति थप गरिएको उनले उल्लेख गरे । अशक्त, बिरामी, ९० वर्षमाथिका वृद्धवृद्धा र बालबालिकाका निम्ति विशेष व्यवस्था गरिने उनले बताए ।

गृहमन्त्री रवि लामिछानेको जवाफ पढ्नोस्–
भदौ मसान्तसम्म पनि कसैले भरिसक्नु भएन छ भने पनि पहिलो चरणमा २८ जिल्लाहरूमा नसक्दा पनि हामीले समय राखेका छौँ, भदौ मसान्तसम्म पनि यहाँहरूसँग समय छ । भदौ मसान्तसम्म भर्दा पनि तपाईंले प्राप्त गर्ने, राज्यले दिने सेवा सुविधाबाट आमनागरिकहरू वञ्चित हुनु पर्दैन । कथम्कदाचित् कसैको भदौसम्म पनि छुटेको रहेछ भने स्पष्ट पार्न चाहन्छु– राज्यबाट प्राप्त गर्ने सुविधाबाट नागरिकलाई राज्यले कहिले पनि विमुख पार्दैन । अहिले छिटै बनाउने, सपरिवार एकैपटक बनाउने भएका कारणले लाइन लाग्न गएको छ । जसको व्यवस्थापनमा अतिरिक्त मानव संशाधनको प्रयोग गरिएको छ, जिल्ला प्रशासन कार्यालयमार्फत । स्थानीय निकायमा पनि थप जनशक्तिको प्रवाह गर्ने काम भएको छ । सूचना लिनेबित्तिकै छिटो गरौँ भन्ने स्वभावका कारणले भीडभाड अवश्य पनि लागेको छ । भीडभाड गर्नुपर्ने आवश्यकता नै छैन । तत्काल गर्नुपर्ने आवश्यकता नै छैन । पहिला २८ जिल्लामा यसलाई कार्यान्वयन गर्ने चरणमा गएका छौँ । २८ जिल्लामा भदौ मसान्तसम्म पनि छुट्यो भने राज्यले तपाईंलाई तपाईंको अधिकारबाट वञ्चित गर्दैन । न्युज एजेन्सी नेपाल