काठमाडौं । अखिल नेपाल फुटबल संघ (एन्फा) ले सोमबार साफ यू–१९ महिला च्याम्पियनसिप खेल्न जाने २३ सदस्यीय टोलीलाई बिदाइ गरेको छ । 

बंगलादेशको ढाकामा शनिबारदेखि हुने प्रतियोगिताका नेपाली लागि टोली मंगलबार त्यसतर्फ प्रस्थान गर्दैछ ।

मंसिर २५ गतेबाट पुस ७ गतेसम्म सिङ्गल राउन्ड रोबिन पद्धतिमा हुने प्रतियोगितामा नेपालसहित आयोजक बंगलादेश, भुटान, श्रीलंका र भारतको सहभागिता रहने छ । 

नेपालले प्रतियोगिताको पहिलो खेल घरेलु टोली बंगलादेशविरुद्ध खेल्नेछ । दोस्रो खेलमा २९ गते श्रीलंका, पुस २ मा भुटान र पुस ४ मा भारतको सामना गर्नेछ । 

लिगका शीर्ष दुई टोली पुस ७ गते उपाधिका लागि भिड्ने छन् । 

एन्फाले पहिलो चरणमा बोलाएको ४० खेलाडीबाट प्रशिक्षक हरिओम श्रेष्ठको नेतृत्वमा गत शुक्रबार अन्तिम २३ सदस्यीय टोलीको घोषणा गरिएको थियो ।

नेपाली टोलीमा राष्ट्रिय टोलीका गोलरक्षक अन्जना राना मगर, रक्षक विमला विक, सविता राना मगर, रश्मी कुमारी घिसिङ, प्रीति राई, रजनी थोकरसहित ६ खेलाडी समावेश छन् । 

यस्तै रक्षक रोजिना श्रेष्ठ, सुस्मा तामाङ, सलोनी राना मगर, मेनुका आले मगर, सरस्वती हमाल, अमिशा कार्कीले यसअघिको यू–१८ साफ च्याम्पियनसिपमा नेपालको प्रतिनिधित्व गरिसकेका छन् ।