काठमाडौं । नेपालकै लोकप्रिय एप हाम्रो पात्रो एपवाट १ करोड भन्दा धेरै रेमिट्यान्स नेपाल भित्रिएको छ । एउटै एपमार्फत विभिन्न सेवा दिँदै आएको हाम्रो पात्रोले दुई महिना अगाडि मात्रै यो सुविधा प्रयोगकर्तामाझ ल्याएको थियो ।   

हाम्रो पात्रो इंक का सीईओ शंकर उप्रेतीले यसबाट अझ काम गर्न थप हौसला प्राप्त भएको बताए । “हाम्रो लक्ष्य भनेको नेपाली प्रयोगकर्ताहरूलाई कम शुल्कमा नेपालमा पैसा पठाउने सुविधा  दिनु हो, अबको केही समयमा अस्ट्रेलिया, जापानबाट पनि यो सुविधा सुरु गर्ने गृहकार्य गर्दैछौं,” उनले भने ।

रेमिट सेवा सुरु भएसँगै कम्पनीले प्रयोगकर्तालाई आकर्षित गर्न विशेष अफर प्रदान गरेको छ । जसअनुसार प्रयोगकर्ताले हाम्रो पात्रोबाट सुरुवाती तीन पटकसम्म निःशुल्क रूपमा रेमिट्यान्सबाट नेपालमा रकम पठाउन सक्ने जनाइएको छ ।

हाम्रो पात्रो एपले नेपाली एपहरुमा नयाँ नयाँ रेकर्ड कायम गर्दै गएको छ । यसअघि १० लाख र ५० लाख हुँदै १ करोड डाउनलोड पूरा गर्नेमा हाम्रो पात्रो पहिलो नेपाली एप बनेको थियो । पात्रो हेर्ने, मिति परिवर्तन फिचरसँगै सन् २०१० मा आईओएसमा तयार भएको यो एप सन् २०१२ मा एन्ड्रोइड प्ले स्टोरमा राखिएको थियो ।