काठमाडौं । नेपाली कांग्रेसको केन्द्रीय निर्वाचन समितिका संयोजक महादेव यादवले राजीनामा दिएका छन् ।

यसअघि दिएको राजीनामा अस्वीकृत गर्दै ‘अधिवेशन थालेपछि बीचमा छोड्न पाइँदैन’ भनेर फर्काएका कांग्रेस सभापति शेरबहादुर देउवाले यसपटक उनको राजीनामा स्वीकृत गरेका छन् । सभापति देउवाले आज समितिमा रहेका वरिष्ठ अधिवक्ता गोपालकृष्ण घिमिरेलाई केन्द्रीय निर्वाचन समिति संयोजकको पत्र दिएका छन् ।

पत्र पाएपछि नवनियुक्त संयोजक घिमिरेले आजै निर्वाचन समितिको बैठक डाकेका छन् । उनले महाधिवेशनका तल्लो तहका अधिकांश काम सम्पन्न भएको र बाँकी काम तालिकाअनुसार नै अघि बढाउन आफूले भूमिका खेल्ने बताएका छन् ।

“नेपाली कांग्रेसको १४औँ महाधिवेशनमा तल्लो तहका अधिकांश काम सम्पन्न भएका छन् । बाँकी काम सम्पन्न गर्ने दायित्व मसहितको टिमको काँधमा आएको छ,” घिमिरेले बाह्रखरीसँग भने, “अब आजै समितिको बैठक बस्छ । महाधिवेशनका कामलाई तालिकाअनुसार नै गर्न स्पिड अप गर्नेछौँ ।” उनले कामको गति नबढाई समयमा अधिवेशन गराउन मुस्किल रहेको पनि बताए ।

राजीनामा दिएर बिदा भएका यादवले भने स्वास्थ्यका कारण देखाएका छन् । विगतमा डडेलधुरासहितका जिल्लाको विवाद अस्वाभाविक रूपमा ल्याएपछि राजीनामा दिएका यादवले अहिले भने स्वास्थ्य नै मुख्य कारण भएको बताएका छन् ।

उनले भने, “जाडो बढेसँगै मेरो स्वास्थ्य समस्या पनि बढेको छ, त्यसैले आराम चाहिएर मैले कांग्रेसको निर्वाचन समितिबाट राजीनामा गरेको हुँ ।” उनले स्वास्थ्यबाहेक अर्को कुनै कारण नभएको पनि बताए ।