दाङ । नेपाली कांग्रेस दाङको जिल्ला सभापतिका लागि चार जनाले उम्मेदवारी दिएका छन् । दाङ कांग्रेसको जिल्ला अधिवेशन भोलि हुँदैछ । सभापतिका लागि शंकर डाँगी, कमलकिशोर घिमिरे, जानकीलाल बस्नेत र भुपबहादुर डाँगीले उम्मेदवारी दिएका हुन् ।

सभापतिमा उम्मेदवारी दिएकामध्ये शंकर डाँगी संस्थापनइतर पक्षका हुन् । अन्य तीनजना संस्थापन पक्षका हुन् ।

सभापति पदका उम्मेदवार शंकर डाँगी कांग्रेसका वर्तमान जिल्ला सचिव हुन् । उनी सभापतिका बलिया उम्मेदवार मानिएका छन् । सभापतिका अर्का उम्मेदवार कमलकिशोर घिमिरे निवर्तमान जिल्ला सचिव हुन् ।  

उनी पार्टीको १३औँ महाधिवेशनमा पनि जिल्ला सभापति पदमा उम्मेदवार बनेका थिए । त्यसबेला उनी पराजित  भए  । उनी गत प्रदेशसभा निर्वाचनमा पनि उम्मेदवार भए ।

यसैगरी अर्का उम्मेदवार बस्नेत प्रदेशसभा निर्वाचनमा उम्मेदवार बनेका थिए  । नेविसंघको राजनीतिदेखि लामो समयसम्म पार्टी राजनीतिमा सक्रिय बस्नेत क्षेत्र नम्बर १ मा बलियो प्रभाव रहेका नेता हुन् । यसैगरी अर्का उम्मेदवार भुपबहादुर डाँगी कांग्रेस क्षेत्र नम्बर २ का निवर्तमान क्षेत्रीय सभापति हुन । उनी गत स्थानीय तहको निर्वाचनमा घोराही उपमहानगरपालिकाका मेयरका उम्मेदवार थिए  । तर, पराजित भए ।

भोलि हुने जिल्ला अधिवेशनमा कुल २ हजार १९२ मतदाता छन् । यीमध्य पुरुष मतदाताको संख्या १ हजार ५११ र महिला मतदाता संख्या ६८१ रहेको छ ।