काठमाडौं । १८औं हस्तकला व्यापार मेला र १६औं हस्तकला प्रतियोगिता काठमाडौंस्थित होटेल ह्यातमा जारी छ । मेलामा नेपाली मौलिक कला, संस्कृति झल्काउने हस्तकलाका सामग्री राखिएका छन् । नेपाल हस्तकला महासंघले आयोजना गरेको हस्तकला व्यापार मेला र प्रतियोगिताको आधिकारिक बैंकिङ पार्टनर नबिल बैंक रहेको छ । 

बैंकले महासंघसँग सहकार्य गर्दै हस्तकला व्यवसायको प्रबद्र्धनमा सहयोग एवम् सहकार्य गर्ने कार्यलाई यस वर्ष पनि निरन्तरता दिएको हो । महासंघसँग बैंकले विगत ३ वर्षदेखि हस्तकला व्यवसायको प्रर्बद्धनमा सहकार्य गर्दै आएको बैंकले जनाएको छ ।
बैंकका एसएमई तथा माइक्रो फाईनान्स प्रमुख निरज बस्नेत डनिलले नेपाली उत्पादनको प्रवर्द्धन गर्न खोजिएको बताए ।

हस्तकला देशको कला संस्कृतीसँग पनि जोडिएको हुनाले यसको प्रबद्र्धन गर्न विगत ३ वर्षदेखि नै महासंघसँग सहकार्य गर्दै उनले बताए ।  

“हस्तकला निर्यात गरेर देशमा विदेशी मुद्रा भित्र्याउने माध्यम पनि हो र यसले देशको पहिचान पनि बढाइरहेको छ । हस्तकला व्यवसाय विस्तार गर्नुपर्छ भन्ने मान्यता लिएर बैंकले हस्तकला व्यवसायीहरुलाई विभिन्न बैंकिङ्ग सुविधासँगै ऋणको व्यवस्था पनि गर्दै आएका छौं । बैंकले गत वर्षको आफ्नो क्यालेन्डरमा हस्तकलालाई नै प्रबद्र्धन गरेको थियो । समग्र हस्तकला व्यवसायलाई नै प्रवर्द्धन गर्नुपर्छ भनेर सहयोग गरेका हौं,” उनले भने ।

बैंकले स्टल राखेर मेलामा हुने कारोबार भुक्तानी सरल बनाउन क्यूआर कोडलगायतका सेवा उपलब्ध गराउँदै आएको छ ।

बैंकले हस्तकला व्यवसायको प्रबद्र्धन गर्न महासंघसँगको सहकार्यमा हस्तकला व्यवसायीहरुलाई ऋण पनि उपलब्ध गराउँदै आएको जनाएको छ ।

महासंघसँग बैंकको यो सहकार्य हुनाका साथै मेक इन नेपालअन्तर्गत नेपाली उत्पादनलाई सहयोग एवं प्रोत्साहन गर्ने बैंकको पहल तथा बैंकको दिगो बैकिङ्ग दृष्टिकोण अनुरुप महासंघसँग साझेदारी गर्दै आएको बैंकले जनाएको छ ।

एउटै छाताभित्र हस्तकला व्यवसाय प्रवद्र्धन गर्ने उद्देश्यले आयोजना गरिएका यस्ता कार्यक्रममा आधिकारिक बैंकिङ्ग पार्टनरको रुपमा सहभागी हुनु आफैँमा खुसीको कुरा भएको डनिलले बताए । यस वर्ष कोभिड १९ महामारीबाट प्रभावित हस्तकला व्यवसायलाई पुर्नरुत्थान गर्न आर्थिक पहुँच पुर्‍याई दक्ष जनशक्तिको रोजगारी सुनिश्चित गर्न सहयोग हुने बैंकले विश्वास गरेको छ ।

हस्तकला व्यापार मेला एवं प्रतियोगिता मंसिर ५ गते सकिनेछ ।