काठमाडौं । प्रमुख प्रतिपक्ष दल नेकपा एमालेका वरिष्ठ नेता तथा पूर्वप्रधानमन्त्री झलनाथ खनालले राज्यकै कमजोरीका कारण मुलुकमा भ्रष्टाचार बढ्दै गएको दाबी गरेका छन् । वरिष्ठ नेता खनालले राज्यले नीतिगत व्यवस्था नगरेकै कारण मुलुक विश्वमै भ्रष्ट मुलुकको रुपमा चित्रण हुन पुगेको पनि बताए ।
मंगलबार व्यवस्थापिका संसदको सुशासन तथा अनुगमन समितिको बैठकमा उनले विगतमा स्रोत र साधनलाई दुरुपयोग हुन नदिन राज्यले उपयुक्त नीति नलिएपछि मुलुकमा आर्थिक अनियमितताको श्रृंखला नै सुरु भएको पनि उल्लेख गरे । वरिष्ठ नेता खनालले अव भने अख्तियार दुरुपयोग अनुसन्धान आयोगले भ्रष्टाचारलाई नियन्त्रण गर्न उपयुक्त कदम चाल्ने विश्वास पनि व्यक्त गरे ।
नेता खनालले अख्तियार दुरुपयोग अनुसन्धान आयोगलाई भ्रष्टाचार नियन्त्रणका लागि अझ बढी जिम्मेवार बन्न पनि ध्यानाकर्षण गराए । उनले शिक्षा र स्वास्थ्यको क्षेत्रमा सबैभन्दा बढी भ्रष्टाचार भएको पाइएको उल्लेख गर्दैं त्यसलाई नियन्त्रण गर्न पनि आवश्यक कदम चाल्न अख्तियार दुरुपयोग अनुसन्धान आयोग अग्रसर हुने विश्वास पनि व्यक्त गरे ।
