चितवन । चितवनमा निषेधाज्ञा थप खुकुलो गर्दै लगिएको छ ।

जिल्लामा कोरोना संक्रमणदर र मृत्युदर घट्दै गएका कारण निषेधाज्ञा खुकुलो गर्दै लगिएको जिल्ला प्रशासन कार्यालय चितवनले जनाएको छ ।

आज कार्यालयले आदेश जारी गर्दै आउँदो असोज १५ गतेसम्म निषेधाज्ञा थप गरेको छ । यसअघि जारी निषेधाज्ञा बिहीबार राति १२ बजे सकिँदै छ ।

कार्यालयका सूचना अधिकारी खेमराज पौडेलले पछिल्लो समयमा कोरोना संक्रमणदर र मृत्युदरमा क्रमशः कमी हुंँदै आएकोले निषेधाज्ञा खुकुलो गर्दै लगिएको बताए ।

“यसअघि गरिएको निषेधाज्ञामा सक्रिय संक्रमितको संख्या एक हजार हाराहारीमा थियो, अहिले ७०० भन्दा पनि कम छ,” पौडेलले भने ।

जारी नयाँ आदेशमा सभा–सम्मेलनका लागि मापदण्ड अपनाएर सीमित संख्यामा मानिस रहेर सञ्चालन गर्न अनुमति दिइएको छ । सिनेमा हलका सञ्चालकले कार्यविधि पेस गरेमा सोहीअनुसार अनुमति दिइने उल्लेख छ ।

विद्यालय व्यवस्थापन समिति र स्थानीय सरकारको समन्वयमा असोज १ गतेदेखि विद्यालय सञ्चालन गर्न सकिने उनले बताए ।

अरू आदेश यसअघिकै निरन्तरता हुने जिल्ला प्रशासन कार्यालयले जनाएको छ । संक्रमणदर थप घट्दै गएको खण्डमा जारी निषेधाज्ञाको समयावधिभित्र नै आदेश संशोधन एवं पुनरवलोकन गर्न सकिने आदेशमा उल्लेख छ ।