लन्डन । बेलायतको संसद्ले चिनियाँ राजदूतलाई प्रतिबन्ध लगाएको छ ।

चीनले केही बेलायती सांसदहरूलाई प्रतिबन्ध लगाएको बदलामा बेलायतका लागि चिनियाँ राजदूतलाई त्यहाँको संसद्मा प्रवेश निषेध गरिएको हो ।

चीनसम्बन्धी सर्वदलीय समूहले बुधबार संसद्मा आयोजना गरेको जमघटमा चिनियाँ राजदूत झङ जगवाङ सहभागी हुने बताइएको थियो । तर, विरोध भएपछि तल्लो सदन हाउस अफ कमन्सका सभामुख लिन्ड्जी होयल र माथिल्लो सदन हाउस अफ लर्ड्सका सभामुख लर्ड मक्फलले झङको सहभागिता सम्भव नभएको बताए ।

चिनियाँ दूतावासले यस कदमलाई ‘घृणित र कायर’ निर्णय भन्दै यसले दुई देशको स्वार्थमा हानि पु¥याउने प्रतिक्रिया दिएको छ ।

गएको मार्चमा चीनले आफ्नो देशविरुद्ध अफवाह फैलाएको भन्दै बेलायतको तल्लो सदनका पाँच र माथिल्लो सदनका दुई सांसदलाई यात्रा प्रतिबन्ध लगाएको थियो र उनीहरूको सम्पत्ति रोक्का गरेको थियो ।

शिन्जियानमा मानवअधिकारको उल्लंघन गरेको भन्दै चिनियाँ अधिकारीहरूमाथि बेलायतले पहिलोपटक लगाएको प्रतिबन्धको प्रत्युत्तरमा चीनले यस्तो कदम उठाएको थियो ।

तथापि, चीनसम्बन्धी संसदीय समूहले चिनियाँ राजदूतलाई निमन्त्रणा दिने निर्णय गरेको थियो । तर, गएको साता प्रतिबन्धमा परेका सांसदले आफूहरूको चासो व्यक्त गर्दै सभामुखलाई पत्र लेखेका थिए ।

दुई देशबीच तनाव बढिरहेका बेला प्रतिबन्धसम्बन्धी समाचार आएको हो । बीबीसीबाट ।